Ka vdekur gruaja e njërit ndër prijësve më të shquar të Lëvizjes Kombëtare të Kosovës, Shukrie Bunjaku Osmani.
E ndjera, njëherit ishte edhe lexuese e rregulltë e gazetarë kombëtare Bota sot.
Njoftimi për vdekjen e saj e ka bërë Xhafer Shatri përmes rrjetit social, Facebook.
Njoftimi i plotë:
PASKESH IKUR AJO QE PERSONIFIKONTE, SI PAK KUSH TJETER, BUJARINE DHE QENDRESEN E GRUAS SHQIPTARE
Dje, më 12 gusht 2023, paskesh ikur në botën e përtejme Shukrie BUNJAKU OSMANI, gruaja e Kadri OSMANIT, njërit prej prijësve më të shquar të Lëvizjes Kombëtare të Kosovës.
Jeta dhe përpjekjet e çiftit Osmani janë një faqe krejt e veçantë e historisë së Kosovës; një jetë e tërë në shërbim të Atdheut, një kalvar vuajtjesh, burgimesh të gjata e privimesh drastike.
Shukrie Osmani ishte një grua e paepur nëpër shpirtin e së cilës u përthyen ëndërrat, shpresat dhe qëndresa më e çashtër e një kombi.
Sot, një plejadë e tërë pjesëtarësh të Lëvizjes Kombëtare të Kosovës dhe çdo shqiptar i vetëdijshëm se sa i shtrenjtë ishte çmimi i Lirisë, në nderim të Shukrie Osmanit, në shpirtin dhe në shtëpitë e tyre e vënë Flamurin në gjysmështizë.
Në pamundësi për pjesëmarrje në varrim dhe për një tufë të munguar zambakësh të bardhë, një nderim i posaçëm e me dorë në zemër për Gruan që krejt Kosova i detyrohet përgjithmonë!
Lavdi e përjetshme për gruan e paepur,
për bashkëshorten besnike,
për Nënën e veçantë dhe bashkëluftëtaren e pathyeshme,
Shukrie BUNJAKU OSMANI!
