Afër 500 mijë euro ka pranuar donacion Klinika e Radiologjisë nga Zyra për Mbrojtje dhe Bashkëpunim në Ambasadën Amerikane. Në ceremoninë e dorëzim-pranimit të donacionit të CT-së për këtë klinikë, është theksuar se ky investim do të ketë një ndikim të madh në shëndetin dhe mirëqenien e qytetarëve.
Ministri i Shëndetësisë, Arben Vitia derisa ka falënderuar Shtetet e Bashkuara të Amerikës për këtë donacion, këtë ditë e ka vlerësuar të rëndësishme për shëndetësinë në vend dhe shtoi se pacientët do të marrin shërbime të sigurta përmes teknologjisë më të avancuar në fushën e radiologjisë.
Vitia: Donacioni i miqve tanë amerikan kap vlerën prej mbi 499 mijë euro
“Për vite me radhë ShBA-të kanë qenë jo vetëm një aleatë, por edhe një mbështetës i pandalshëm në rrugën tonë drejt progresit dhe zhvillimit. Dhe kjo mbështetje ka luajtur një rol thelbësorë në forcimin e institucioneve tona, përmirësimin e infrastrukturës dhe ngritjen e standardeve të jetesës për qytetarët. Edhe këtë ditë të sotme e konsideroj se mund ta shënojmë si një ditë të veçantë dhe të rëndësishme për shëndetësinë kosovare. Është nderi im i madh që të jem këtu sot për të përuruar një investim që do të ketë një ndikim të madh në shëndetin dhe mirëqenien e qytetarëve. Do të ketë një efekt të jashtëzakonshëm në diagnostikimin e hershem në rastet emergjente, qoftë ato politramuatike. Donacioni i miqve tanë amerikan kap vlerën prej mbi 499 mijë euro e cila është dedikuar për emergjencën e klinikes së radiologjisë dhe përfshin pajisjen më të avancuar të tomografisë së kompjuterizuar me 128 prerje”, tha Vitia.
I pranishëm në këtë ceremoni ishte edhe ambasadori amerikan, Jeffrey Hovenier, i cili ka theksuar se janë të përkushtuar të mbështesin përpjekjet e Kosovës për të përmirësuar nivelin e kujdesit shëndetësor dhe spitalet e Kosovës.
Hovenier: Përkushtimi ynë ndaj popullit të Kosovës është po aq i fortë si gjithmonë dhe siç tregon ky donacion
“Tani ky projekt i ndihmës humanitare i financuar nga Komanda Evropiane e SHBA-së dhe i koordinuar nga Zyra e Bashkëpunimit të Mbrojtjes të Ambasadës sonë, është një tjetër reflektim i angazhimit të Shteteve të Bashkuara për rritjen e cilësisë së jetës dhe në këtë rast, dhe në këtë rast të shërbimeve shëndetësore për të gjithë qytetarët e Kosovës. Siç tha ministri, i vlerësuar në afro 500,000 dollarë, ky skaner CT jo vetëm që do të përmirësojë aftësitë e klinikave të urgjencës, por edhe do të rrisë standardin e kujdesit në departamentin e radiologjisë. Ne jemi të përkushtuar të mbështesim përpjekjet e Kosovës për të përmirësuar nivelin e kujdesit shëndetësor dhe spitalet e Kosovës dhe kjo është diçka që kemi bërë për shumë vite...Ne duam një Kosovë të suksesshme multietnike, sovrane të pavarur, duam një Kosovë të shëndetshme dhe ky donacion është pjesë e kësaj. Përkushtimi ynë ndaj popullit të Kosovës është po aq i fortë si gjithmonë dhe siç tregon ky donacion, ka një solidaritet dhe përkushtim të vazhdueshëm që pasqyron partneritetin tonë të qëndrueshëm”, tha ai.
