Besnik Tahiri, nënkryetar i AAK-së, ka bërë thirrje për rishikim urgjent të formulës së financimit të pushtetit lokal në Kosovë. Kjo vjen si pasojë e rezultateve të regjistrimit të popullsisë 2024, të cilat tregojnë ndryshime të konsiderueshme në numrin e banorëve në 29 komuna.
“Formula e tanishme financiare për komuna është jo kompatibile, apo kësaj formule i ka skaduar afati,” tha Tahiri në një postim në Facebook. Ai theksoi se këto ndryshime demografike kanë ndikim të drejtpërdrejtë në financimin e investimeve kapitale dhe çështjeve të tjera komunale.
Shefi i Grupit Parlamentar të AAK-së vuri në dukje se shumë aspekte të qeverisjes lokale kërkojnë rishikim funksional, duke përfshirë financimin e arsimit primar dhe shëndetësisë primare, kontratat kolektive, shërbimet sociale, dhe ndarjen e parashkollorëve nga arsimi primar.
Tahiri gjithashtu përmendi nevojën për të rishikuar numrin e asamblistëve komunalë. Ai shprehu mirënjohje ndaj Institutit Kosovar për Qeverisje Lokale për analizën e tyre, duke e konsideruar atë si një kontribut të vlefshëm për institucionet që do të ndërmarrin reforma në financat e pushtetit lokal.
