Përmes platformës ndreqe.com, një qytetar ka shprehur një ankesë për disa mbeturina mbrapa Shtëpisë së Kulturës në Kamenicë.
Ai kësaj ankese i ka bashkangjitur edhe fotografi, në të cilat shihen mbeturinat e mbledhura në atë zonë.
Mirëpo, pas kësaj ankese, Komuna e Kamenicës ka reaguar me pastrim.
Udhëheqësja e Sektorit për Siguri dhe Emergjenca në Komunë të Kamenicës, Florentina Kryeziu, ka thënë për Telegrafin se kompania kontraktuese e ka bërë pastrimin.
Ndër të tjera, Kryeziu ka theksuar se kjo depone ilegale e ka shëmtuar atë pjesë.
“Në këtë pjesë të qytetit është bërë pastrimi i kësaj deponie të vogël ilegale, gjë që e ka shëmtuar këtë pjesë dhe nuk është e lejuar hudhja e mbeturinave të ndryshme në këtë pjesë. Kompania kontraktuese e ka bërë pastrimin dhe e kanë rregulluar në mënyrën më të mirë të mundshme. Mbesim me shpresë që këto pjesë të bukura të qytetit të mos degradohen nga mbeturinat”, ka thënë Kryeziu.
