Policia Kufitare e Kosovës ka arrestuar 20 persona të dyshuar për kontrabandë me emigrantë, në disa kontrolle që ka kryer në disa lokacione, në rajonin e Mitrovicës së Jugut dhe Prizrenit.
Si rezultat i hetimeve të mëhershme nga Sektori i Hetimeve të DPK-së dhe me asistimin e njësive tjera mbështetëse të PK-së, janë kryer kontrolle në 10 lokacione ku përfshihen shtëpi, hotele dhe objekte përcjellëse.
Sipas njoftimit, 14 prej të arrestuarve janë shtetas të Kosovës, ndërsa 6 me shtetësi nga vendet e lindjes si: Iraku, Siria dhe Palestina, të cilët dyshohet se kanë kryer veprën penale të lartshënuar.
Gjatë kontrollit janë gjetur dhe sekuestruar provat materiale si ne vijim: 22 telefona celular, 11 automjete të ndryshme, 6 fishekë cal 7.65 mm, një grirëse për mariuhanë, dy pako rizzllo, tri çip (memoristik) - kartela të telefonit, disa sim kartela dhe një sasi e mjeteve monetare.
Pas përfundimit të procedurave, me vendim të prokurores së rastit nga Prokuroria Themelore e Krimeve të Rënda ne Mitrovicë, janë dërguar ne mbajtje prej 48 orëve 11 të dyshuar, ndërsa 9 prej tyre janë liruar në procedurë të rregullt.
