Policia e Vlorës ka shpallur në kërkim një 28-vjeçar lidhur me konfliktin e mbrëmjes së të dielës, 27 qershor, në lokalin e një resorti në Drimadhes të Vlorës.
Sipas policisë "shtetasi H. F,dyshohet se mbrëmjen e djeshme, në Drimadhes, gjatë një konflikti të çastit, ka qëlluar në ajër me armë sportive pistoletë dhe është konfliktuar fizikisht me shtetasit D. D. dhe O. T".
Ora News mëson se ngjarja ka ndodhur në resortin Drimadhes Inn , rreth ores 20:00. H.F në gjendje te dehur ka nisur të konfliktohet me kamarierin e lokalit për shërbimin.
Në konfliktin verbal më pas janë përfshirë dhe menaxheri dhe kamarierë të tjerë të resortit, teksa kanë ndërhyrë dhe pushues të tjerë për të qetësuar situatën.
Pas kësaj ai është ngjitur në dhomën e hotelit ku po rrinte për tu kthyer më pas me një armë zjarri të cilën ua ka drejtuar kamarierëve dhe pushuesve dhe më pas ka hapur zjarr në ajër për ti trembur.
Më pas është larguar me shpejtësi me automjetin e tij përpara se të mbërrinte policia.
Forcat RENEA mbërritën në vendngjarje. Nga ana e policisë vijon puna për kapjen e autorit ndërsa materialet i kaluan Prokurorisë, për veprime të mëtejshme procedurale.
