Një shtetas i Serbisë është arrestuar sot në Merdare, pasi u ka ofruar zyrtarëve policorë 50 euro ryshfet.
Siç thuhet në njoftimin e Policisë së Kosovës, rasti ka ndodhur rreth orës 12:00, në Pikën e Kalimit Kufitar Merdare, në hyrje për në Republikën e Kosovës, gjatë procedurave të kontrollimit të dokumentacionit, personi me inicialet N.V. (28) ka ofruar ryshfet për të kaluar kufirin me dokumentacion që nuk i plotëson kriteret për kalim të kufirit.
Lidhur me rastin është njoftuar Drejtoria për Hetimin e Krimeve Ekonomike dhe Korrupsionit, nga hetuesit policorë i dyshuari është intervistuar, si provë materiale është sekuestruar kartëmonedha prej 50 eurove dhe është iniciuar rasti nën dyshimin e kryerjes së veprës penale ‘dhënie ryshfeti’.
Lidhur me rastin është njoftuar prokurori kujdestar. Me aktvendim të prokurorit, i dyshuar dërgohet në ndalim policor deri në 48 orë.
