Policia e Kosovës (PK) njofton se është arrestuar J.S (19-vjeçe) nën dyshimin se e njëjta ia vodhi një shumë parash, një radio të veturës si dhe i la një mesazh kërcënues viktimës Z.S (48-vjeçar).
Lajmi u bë i ditur përmes një njoftimi nga policia, ku thuhet se rasti kishte ndodhur më 20 korrik, raporton “Betimi për ”.
“Drejtoria Rajonale e Policisë së Kosovës, Stacioni Policor në Kamenicë me datën 20.07.2022 ka pranuar një ankesë nga ankuesi kosovar serb Z.S. (1974) nga fshati Bosce, Komuna e Kamenicës i cili ka njoftuar se i janë vjedhur një shumë e parave, një radio e veturës si dhe i është lënë një mesazh kërcënues i shkruar me dorë në veturën e tij”, thuhet në njoftim.
Tutje thuhet se në konsultim me prokurorin ishte iniciuar rasti si “Vjedhje e rëndë” dhe “Kanosje”.“Njësia e Hetimeve nga Stacioni Policor Kamenicë pas një pune mirë të organizuar operacionale dhe pas një hetimi intensiv ka arritur të zbuloj dhe të gjejë prova të mjaftueshme se kryerësi i kësaj vepre penale është e dyshuara kosovare serbe J.S. (2003)”, thuhet tutje.
Sipas policisë, e njëjta është arrestuar mbrëmë (21 korrik) dhe intervistuar në bazë të procedurave ligjore.
“Në lidhje me rastin është njoftuar Prokurori i Shtetit i cili ka urdhëruar që e dyshuara të lirohet në procedurë të rregullt dhe rasti me Kallëzim Penal të procedohet ne Prokurorinë Themelore Gjilan”, thuhet në fund të njoftimit.
