Policia e Kosovës ka arrestuar të martën në Rahovec një person të dyshuar për “mbajtje në pronësi, kontroll ose posedim të paautorizuar të armëve”. Të dyshuarit i është konfiskuar një armë automatike.
“Në zbatim të masave për parandalimin dhe luftimin e kriminalitetit, Sektori i Hetimeve në kuadër të Stacionit Policor në Rahovec, ka zhvilluar hetim preliminar lidhur me informatën e pranuar se i dyshuari Sh. H., shtetas i Republikës së Kosovës, posedonte armë në mënyrë të paautorizuar.
Me datën 9 janar 2024, në koordinim me prokurorin e shtetit është kryer kontroll në vendbanimin e të dyshuarit në fshatin Ratkoc-Rahovec. Gjatë kontrollit në posedim të tij është gjetur dhe është konfiskuar një armë zjarri automatike dhe një karikator i po të njëjtës armë:”, thuhet në njoftimin e policisë.
Pas intervistimit me vendim të prokurorit të shtetit i dyshuari, sipas policisë, është liruar në procedurë të rregullt. Ndaj tij thuhet se është iniciuar rast “mbajtje në pronësi, kontroll ose posedim të paautorizuar të armëve”.
