Në këtë klub nate në Prishtinë, në rrugën “Lidhja e Pejës” nuk ishte kaq qetë edhe në orët e para të së mërkurës.
Nga një përleshje në të cilën u përdorën edhe armët një person mbeti i plagosur, dhe tre të tjerë morën lëndime nga goditja me mjete të forta.
“Sot rreth orës 01:20, policia ka marrë informatën për të shtëna me armë në rrugën “Lidhja e Pejës” në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e deritanishme raportohet për katër persona të lënduar, njëri prej të cilëve dyshohet të ketë marrë lëndime nga arma e zjarrit ndërsa tre të tjerë kanë pësuar lëndime gjatë përleshjes ku dyshohet të jenë përdorë mjete të forta”, njoftoi Policia e Kosovës.
Por, në përleshje duket të jenë përfshirë shumë më shumë persona, pasi numri i të arrestuarve nga Policia e Kosovës është shumë më i madh.
“Hetuesit policor në koordinim me prokurorinë, ndërmarrin veprimet hetimore për ndriçimin e plotë të rastit. Deri tani nga ana e policisë janë identifikuar, arrestuar dhe dërguar në mbajtje 13 persona të cilët dyshohet të jenë të përfshirë në këtë rast që është cilësuar si vrasje në tentativë”.
Lidhur me arsyet që çuan deri te kjo përleshje nuk u dhanë nga Policia e Kosovës.
Përgjigje nuk u dhanë as nga Prokuroria Themelore e Prishtinës në pyetjet e dërguara nga televizioni.
