Marketet në vendin tonë jo rrallëherë janë cak i hajnave. Kjo dukuri po krijon pasiguri dhe frikë si për qytetarët, ashtu edhe për punëtorët që punojnë në këto biznese. Vjedhjet e grabitjet shpesh kryhen edhe nën kërcënimin e armëve të zjarrit ose mjeteve të tjera të rrezikshme.
Një rast më i fundit i tillë ka ndodhur mbrëmë në orët e vona në Pejë, ku një punëtore në një market është kanosur nga një person.
Media mëson se rasti ka ndodh në marketin në rrugë “Gjergj Fishta”.
Sipas informacioneve të para, i dyshuari i maskuar dhe nën kërcënimin e mjetit të mprehtë (thikë) ka marrë nga arka e marketit një shumë parash prej 500 eurosh.
Me t’u raportuar rasti, njësitë përkatëse kanë dalë në vendin e ngjarjes, ku kanë kryer ekzaminimet e nevojshme që ndihmojnë në zbardhjen e rrethanave të rastit dhe identifikimin e hajnit.
Me urdhër të Prokurorit të Shtetit, rasti është cilësuar ‘Grabitje’, teksa veprimet tjera ligjore do merren posa të kapet i dyshuari.
