Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhunë psikike e fizike nga bashkëshortët e tyre dhe anëtarët tjerë të familjes.
Media mëson se një rast i tillë ka ndodhur së fundmi në familjen Murseli në Ferizaj, ku një grua është rrahur fizikisht nga burri i saj.
Sipas informacioneve të para, si pasojë e lëndimeve të marra, viktima ka pranuar ndihmë mjekësore.
Ndërkaq, pas kontrolleve të Policisë në shtëpinë e të dyshuarit, janë sekuestruar: një pushkë gjuetie, një pistoletë, dy karikatorë me 43 fishekë, një armë pistoletë pneumatike dhe tre fishekë të armës me gas.
Me vendim të prokurorit kujdestar, i dyshuari është dërguar në mbajtje.
