Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i rëndë ka ndodhur dje në një familje në Viti, ku intervenoi Policia pas mesnate.
Sinjali mëson se viktima e ka denoncuar rastin në Polici, ku ka deklaruar se pas një konflikti me të birin, i riu ka ushtruar dhunë ndaj tij.
Burimet thonë se i dyshuari është kapur edhe me armë ilegale, që u sekuestrua gjatë bastisjes së Policisë në shtëpinë e tyre.
I dyshuari është arrestuar e shoqëruar në stacion policor, ku u intervistua lidhur me rastin.
Me urdhër të Prokurorit të Shtetit, i njëjti është dërguar në mbajtje dhe rasti është iniciuar si ‘Dhunë në familje’.
