Dy persona të maskuar dhe nën kërcënimin e armës në orët e mëngjesit të sotëm dyshohet se kanë grabitur një shumë të parave në një pompë të derivateve në Shupkovc të Mitrovicës.
Lajmin për telegrafin e bëri të ditur zëdhënësi i Policisë së Kosovës për rajonin e Mitrovicës, Avni Zahiti.
Sipas tij, të dyshuari kanë ikur nga vendi i ngjarjes, ndërsa janë duke u ndërmarrë veprime hetimore.
“Me datën 17 janar 2025, rreth orës 04:15, Policia ka pranuar informatën se në një pompë të derivateve në fshatin Shupkovc të Mitrovicës, ka ndodhur një grabitje. Bazuar në informatat dhe hetimet fillestare, dyshohet se dy persona të maskuar nën kërcënimin e armës kanë grabitur një shumë të parave dhe kanë ikur në drejtim të panjohur.
Njësitet përkatëse policore janë duke ndërmarrë veprime hetimore në drejtim të identifikimit të personave të dyshuar dhe mbledhjen e provave relevante në lidhje me këtë rast”, ka thënë Zahiti.
