Siguria publike në Kosovë konsiderohet se po cenohet nga krime të natyrave të ndryshme, sidomos nga vjedhjet e grabitjet, fenomen ky mjaft shqetësues, që po shkakton humbje e pasiguri. Një rast i tillë ka ndodhur në familjen Murati në fshatin Jezerc të Ferizajt.
Pronari i shtëpisë ka kërkuar ndihmën e Policisë ditën e djeshme dhe e ka denoncuar vjedhjen që ndodhi në shtëpinë e tyre.
Media ka mësuar se në shtëpinë e familjes Murati, hajnat kanë arritur të depërtojnë në pullaz – ku pronari kishte lënë një shumë jo fort të vogël parash.
Bazuar në dëshminë e tij, bëhet fjalë për hiç më pak se 30 mijë euro para të gatshme – që pronari i shtëpisë i kishte fshehur në kavanozë.
Viktima nuk ka ngritur dyshime se kush mund te jenë personat që ia vodhën paratë, por ka kërkuar ndihmë.
Si rezultat i denoncimit, njësitë policore kanë intervenuar menjëherë në vendin e ngjarjes dhe kanë kryer ekzaminimet që ndihmojnë në zbardhjen e rrethanave të rastit dhe çojnë në identifikimin e personave të dyshuar.
Me urdhër të prokurorit, rasti është cilësuar ‘Vjedhje e rëndë’, teksa vazhdojnë hetimet për gjetjen e të dyshuarve dhe arrestimin e tyre.
