Një konflikt verbal mes dy personave në fshatin Llugali në Lipjan eskaloi në kanosje me armë zjarri, por që fatmirësisht nuk pati përdorim të armës. I dyshuari për rastin përfundoi në ndalim për armë ilegale pasi të njëjtit iu bastis shtëpia.
Siç merr vesh media, i dyshuari fillimisht ka pasur një mosmarrëveshje me viktimën, të cilin e ka kërcënuar me një armë që e posedonte pa leje.
Përballë kësaj situate, rasti është lajmëruar në Polici dhe si rezultat kanë intervenuar njësitë përkatëse.
Shtëpia e të dyshuarit është kontrolluar, me ç’rast janë konfiskuar një armë, rreth 70 fishekë, ndërsa në veturë u gjet një fishek i armës.
Pas konfiskimit të provave në vendin e ngjarjes, i dyshuari është shoqëruar në stacion policor, ku është intervistuar lidhur me rastin.
Ndaj tij, Prokurori i Shtetit ka urdhëruar masën e ndalimit policor dhe ndërmarrjen e veprimeve të nevojshme ligjore.
