Lugina mbretërore
Ç’ na ishte dikur,
Tani më ka ngelur
Veç asht e lëkurë!
E zhveshën nga vlerat
E zhytën në llucë,
Këmbët ia futën
T’dyjat në një këpucë!
E ka shtrirë peshqirin
Në tre republika…
S’e shpëton dot
E gjithë Amerika!
Sa për Beogradin
Prishtinë e Tiranë,
Pushtetarët dreqin
E mbajnë nën jorgan!
Ka humbur pleshti
I fjalës së urtë,
Mbase lidershipi
I ka shitur drutë!
Po e pret pranverën
Sa të çelin lulet,
Në zgjedhjet e reja
Përsëri të ngulet!
Me të ngulur shpesh
Na është mësuar jeta,
Të na rrojnë premtimet
Në luftë për pushtet!
