Na ishte se ç’na ishte
Një herë demokracia,
Kërpesh pa gërbishte
Katandis Shqipëria.
Katandis kokoshi
Në një thelë të mjerë,
Kopuku, kodoshi
Na mbyllën çdo derë.
Na e çuan thikën
Në asht e në kockë
Vra natën, qajë ditën,
Politika gropë…
Politika gropë
Politikë gazepi
Kokën në Evropë
Duart veç te xhepi.
Varfëri mizereja
Ulur në çdo vatër
Veç hipokrizia
Është monedhë e pastër…
Një hap bëjmë para
Dy hapa bëjmë pas,
Nën marshe, fanfara
Mbushur me maras.
Na ngopin me fjalë,
Hamë me lugë bosh,
Politika ngjalë
Popullit i bën kosh.
Njëzet e shtatë vjet
Batërdi, rrëmete
Politikanë lanetë
Hani veç për vete…
Vjedhje poshtërim
Katrahurë rrëmujë
Të varfrin të mjerin
Ç’e ulët në gjunjë…
Ia mbushët Sovranit
Trupin plot me plagë
Pjella të shejtanit
Veç vidh ditë e natë…
Bëtë nëntëdhjeteshtatë
Gjëmëmadhin Gërdec,
Kuja ditë dhe natë
Në teh të briskut ec.
Njëzet e një janari
Ç’masakër mizore
Katër demonstrues
Në shesh mbetën prore.
Krimi dhe ndëshkimi
Janë fytyra juaj
Ulërin mallkimi
Popull hiq e vuaj…
Shitët armatime
Shitët dinjitetin,
Pa pasur parime,
Ia vutë ferrën shtetit.
Ç’e çuat ushtrinë
Në zgrip të greminës,
Na e vratë lirinë
Me thikë pas shpinës.
E kthyet arsimin
Në kohë të qiriut
O pjella të delirit
Vrasës të njeriut.
Shëndetin e kthyet
Në markë konçesioni
Te këmbët vutë kryet,
Bythën tek timoni.
Rrënuat fabrika,
Rrënuat uzina,
Poshtë dialektika
Popullit i vutë mina!
Popullin morët zvarrë
Ndër shtigje tërbimi
Sharlatanë të marrë
Në duar thika krimi…
Shkatërruat gjithçka
Vreshta dhe pemtore
Parja e zeza vardha
Plagët s’po zënë kore.
Se pa u mbyll e vjetra
Hapet plagë e re
Popull i mashtruar
Shqiptarë pa atdhe.
Ikim nga sytë këmbët
Rrugëve të Evropës
Na i mpiu dhëmbët
Melodi e pordhës.
Melodi debile
Për shpëlarje truri,
Politikanë skile
Na vutë majë huri…
Njeriu për njerinë
Ujk e shkuar ujkut
Ç’e prishët njerëzinë
Ia pretë krahët bujkut.
Ia pretë krahët shpresës,
Harbuat rininë
Me shiringë droge
Injektuat marrëzinë.
Nuk njeh vllai vëllanë,
As dhe motra motrën,
Na grabitët paranë,
Shkrumb na e bëtë votrën.
Nuk ka humanizëm,
Nuk ka dinjitet,
Ka veç ekstremizëm,
Paraja është Mbret.
Poshtë e lartë barbarë
Lart e poshtë dreqër
I meçuri del i marrë
Të marrët dalin shenjtër…
Gjer në asht e keqja,
Njësh me lëkurën,
Vuajtja edhe heqja
Në çdo trup lënë vulën.
Na flet për moral
Kjo oligarkia
Virtyti në kanal
Ndot e pis Shqipëria.
Shqipëri mjerane
Shqipëri me halle
Ta ngritën tërbimin
Mal e përmbi male.
E latë punëtorin
Dhe pa bukë thatë,
Vritet minatori
Në galeri si kalë.
Bregdetin e kthyet
Në copëra lakmie
Edhe ujin e detit
Na e shitët për pije.
Vritet djelmuria
Në marrëzi landfilli,
Në gjunjë rinia
Çdo vesi dhe trilli.
Horra e barbarë
Pas të janë vërsulur
Të rjepjes ustallarë,
Në gjunjë të kanë ulur.
Zvarrë intelektualë
Zvarrë dhe dijetarë
Kjo ajkë e shoqërisë
Në rresht si ushatarë.
Gëzohu Sovran,
Qeshu, Sovran, qeshu,
Ha e pi fjalime
Me fjalime ngjeshu.
Horra e barbarë
Po bëjnë historinë
Në Ankand Pazar
E lanë Shqipërinë.
E lanë Shqipërinë,
Pa këmbë shqiptari,
Pa themel dhe kulm
Pa një gurë varri.
Djathtas maluketër
Majtas prestigjatorë
Instinktet kanë mbretër
Hiqen si shenjtorë
Palo deputetë
Palo ministror,
Na e latë atdheun
Dopio gjashtë në dorë…
