Nëse jemi ende në eproveta minjësh
Aty ku kemi jetue pesë shekuj të djallit
Ditët ju ngjanin nëtëve të ferrit
Pa ngrohtësinë e diellit zgjoheshim çdo agim
Edhe ashtu pa asnjë sy gjumi mbetëshim zgjuar
Në një mijë mënyra e kemi jetue jetën
Kurrë pa e ditur as cili jam
Për lirinë s'kisha dëgjue asnjëherë
Në një të diele lutjesh më pagëzuan Agim
Dhe poetët ç'më pyesin orë e çast
Cila më je liri sot
A ka tjetër emêr që e ruajmë në zemër
Për nder të lirisë jetova deri sot
Pa pasur kohë për të bukurën e shpirtit tim
Kur në vend të saj puthjet ia fala çlirimtares.
Pengu i fjalës
Ka dymijë vjet që jam peng i fjalës
Kurrë s'më le të bëhem sërish Promethe
Më duhet të dehem a t'i bëhem rebel botës
Njeri duhet të shpëtoj nga mëkatet e veta
S'kam folë as nuk protestova para syve tu
E rujta nderin e Gjergjit kur të çliroj nga djajtë
Para teje edhe para djallit isha këtu Evropë
Ti sikur e harrove burrërinë e lordit Bajron
Edhe zotnat që erdhën pas nesh na i more
Nuk të erdhi keq as për 54 lulet e Prekazit
Sot edhe pas mijëra masakrave ne presim
T'i bijmë kryq e tërthor Evropes së Çarl Haroldit
Peng i fjalës kam mbetur
Mbrëmjeve të acarta të çdo stine
Pa fuqi që të flasim së bashku
Për një përrallë të dashurisë për Evën
Por ne kemi mbetur peng për të fluturuar
Sikur zogjtë që s'dinë më u ba peng i askujt
Eh jetojmë sa për të jetuar si gjysmë njeri
Ku për rreth nesh sillen ulkonjat në të zeza.
E vërteta
E kam pa me sytë e mi të pikëllimit
Njëqind herë kur na e vranë jetën
Dritën e diellit deshen të ma ndalin
Edhe varret të m'i tretin nga atdheu
Shqipërinë s'kisha besë me e dëgjue
Veç më e shikue nëpër errësirën e natës
Njeriu i huaj ju bëra Shqipërisë sime
Kur u linda vdekjen ia fala mbretërisë së saj
Të vërtetën as pas pesë shekuj nuk e gjej
Nuk e di nëse jemi vêrbue në të dy sytë
Pse s'duam ta shohim njeri-tjetrin drejt
Më guxue veç një herë me u ba Gjergj Elez Ali
Për të vërtetën këmbë botës kam me i ra
Thellësitë e Titanikut kam me i pushtue
Deri sa ta gjej fjalën që ma ndalon shpirti
Në çlirimtar copa atomi veten kam me e nda.
