1.
Mora lapsin dhe hijen
e kujtimeve për ty
të kërkoj mikun e penës
që na iku aq shpejt
pa pritur e kujtuar
oguri i vdekjes e rrëmbeu!
E kërkova
mrizeve të vendlindjes
në Shkarashnik
dhe u ndala në Suharekë
aty më pritën të bëmat
punëndriturat e tua...
Atje ku shpesh ajo që ngulfat mbyt
Ty të shndërroi në vyrtyt!
2.
Emri yt u kalit
Në gazeta e antologji
Libra e revista
Për të rritur e për fëmijë.
Në ditët e lagështa
Në tym e tmerr
U shnërrove
në ngjyrë lapsi
U shndërrove në ylber...
Herët e kishe shaluar ëndrrën
Miku im
Të mos humbet mësimi shqip
Rasimi ishte bërë fanar
Në atë mjegull e tym
Shtëpitë shkolla –
Ishin makthi ynë,
Ishin shpëtimi ynë!
Të gjitha janë si testament
Janë si ngushëllim...
3.
E thërras dhimbjen
Të përfytyroj
Edhe kur heshtja vjell dritë
E nata përtypet për jetë
Për portretin tënd -
A të shkruaj këto vargje
A të skalis në vinjetë?...
4.
U rendite ndër pinjollët e lirisë
Ndër pinjollët e shkollimit shqip,
Prapa le shembullin e krenarisë
I paharruar në faqe të historisë!
(Pejë, 23 qershor 2021)
