Dua të ndërtoj
Një qytet t'pambuktë
Ku s'do të ketë vend
Për hienë as për ujk
Një qytet me plan
Shumë të butë, kuptohet
I pambuktë do t' jetë
Që kurrë s'do t' rrëzohet
Me butësi, mirësjellje
Dhe me besënikëri
Do t'i ndërtoj kullat
T'larta, miqtë e mi
Jo prej gurësh, as tullash
Por me pupla pëllumbash
Do t'i ndërtoj shkollat
Dhe çerdhet e bukura
Dhe kopshtet e parqet
Për zogjtë edhe fluturat
Bedenet e qytetit t'ri
Do t'i ndërtoj veç me dashuri
Dhe me vlerën njerëzore
E me besën stërgjyshore
Kryetar t'qytetit
Do ta bëj një fëmijë mitar
Sepse ne të rriturit
Po bëhemi hileqarë
