Dardani një tokë qiellore
po ngelet shkretë pa jetë e pa troje
Deri dje me pushkë e penë
bijtë e tu e mbajtën Kombin
sot shqiponjat po ngjajnë me korbin
po e lanë trollin e po lanë zotin
As ka luftë as ka beteja
dardanët e tu po i merr era
Ikin, ikin pa pra si preja
pa pas termet, pa vra rrufeja
Ku në shekuj zanat nuk vdiqen
na dhanë gji e shtat na rritën
Në ato oda ku princat dolen
nuk çelën derë e s`ka as votër
shtëpia bosh pa vëlla e pa motër
As s’ka dasma as gëzime
As fejesa e përbatime
Ke veç troje bosh e të harrueme
Plot me therra e gardhe të rrëzueme
Nuk ka prag as bujrum burri
Pikon loti e qan dhe guri
Moj vendlindje po të lamë pa lindje
si tokë e nëmur pa përcjellje e pa pritje
t’lamë shkretë e të shtojmë veç varre
thatë pa jetë Dardani arbnore.
