1 Qershori është Dita Botërore e Fëmijëve, të cilët në këtë festë bëhen qendra e veprimtarive që u kushtohen vetëm atyre. Me rastin e 1 Qershorit fëmijët gëzojnë, por organizojnë dhe veprimtari të larmishme. Konkretisht, në Qendrën Kulturore të Bashkisë Mat, në bashkëpunim me Galerinë e Arteve "Tahir Tahiraj" dhe Qendrën Kulturore të Fëmijëve "Ymer Neli" u hap ekspozita e piktoreve të reja, motrave Stela, Steisi dhe Suada Barhani, nxënëse të shkollës 9-vjeçare "Ilia Qiqi" Burrel.
Nderuan me pjesëmarrje drejtues të qeverisjes vendore, të arsimit e kulturës, mësues e nxënës të shkollave 9-vjeçare të qytetit, prindër e të afërm të motrave piktore. Janë mbi njëqind vepra me punime në pikturë dhe vizatime, të cilat u ekspozuan në Galerinë e Arteve "Tahir Tahiraj".
Ndonëse të vogla në moshë, por me talent, që e kanë zilì dhe profesionistët, ata vizatojnë me lehtësi të habitshme objekte dhe pamje të ndryshme, përfytyrojnë gjithçka, që nga përvoja e viteve të para në kopësht. Thellë në shpirtin e tyre pikturojnë me ngjyrat më të bukura, që ua mbushin fantazinë, shpalosin talentin për t'u bërë piktore të njohura, dëshirë që po e jetësojnë çdo ditë. Koleksioni i veprave të ekspozuara është i larmishëm në tematikë, në ngjyra dhe madhësi tabloje.
-Rrugëtimi i tyre artistik, -tha skulptori Artan Kurti, -është i gjatë, pavarësisht se këto janë të vogla. Krijimtarinë artistike e kanë filluar që në moshën 8-vjeçare, me mësues vizatimi, piktorin Hysni Meta. Më pas erdhën te Qendra Kulturore e Fëmijëve, ku mësuan për pikturë me instruktorin Alfred Stafasani. Në ekspozitë janë disa nga shumë punimet e tyre që përzgjodhëm, ato më përfaqësueset, realizime në QKF. Niveli i pikturave që u ekspozuan tashmë është i pëlqyer. Nuk e teproj po të them se këto punime janë të nivelit të vitit të dytë të Liceut Artistik.
Në çelje të ekspozitës. Mësuesi i Artit Figurativ, piktori Alfred Stafasani, duke vlerësuar talentin e motrave Stela, Steisi dhe Suada Barhani, tha se fillimisht ata kanë bërë vizatime të thjeshta.
-Me përkushtim i kam mësuar, -theksoi ai, -se si të përdorin ngjyrat. Dhe ata hap pas hapi kanë ecur shumë mirë. Këtë e tregon vetë ekspozita e sotme, ndër më të bukurat që është hapur në qytetin e Burrelit, falë punës së bërë, vullnetit, saktificës dhe përkushtimit të tyre artistik. Marrja me artin figurativ them se motrave Barhani u ka hapur horizonte të reja. Për më tepër, si mësuesi i tyre, duhet të hesht, sepse vajzat folën mrekullisht me ekspozitën e tyre.
-Të shprehurit nëpërmjet artit ka qënë një pasion i imi që në fëmijëri, -tha Steisi, duke hedhur vështrimin nga dy motrat dhe prindërit e tyre. Dhe Suada, më e vogla, imagjinatën e ka të lirë. Vizaton lodra, objekte natyrore, portrete. Në shpirt, që të tria, janë motra piktore. Prindërit janë krahë tyre, si fëmijë, por dhe artiste të artit figurativ.
Mamaja Xhuljeta, e emocionuar, u shpreh se Stela, Steisi dhe Suada, janë vajza shumë të mira, nxënëse të dalluara në shkollë dhe shoqëri. Me pikturë janë marrë që nga fëmijëria, sidomos në edukimin parashkollor.
-Më shumë më pëlqen të vizatoj portete dhe figura kafshësh, -tha Stela. Kohën e organizojmë në atë mënyrë që të na dalë më parë për mësime, pastaj për pikturë.
Rrugën e artit motrat Barhani e zgjodhën vetë. Përmes pikturave të ekspozuara shprehën gjendjen e tyre emocionale. Kombinimi i ngjyrave që ata përdorin është vërtetë interesant. Të pakta janë fjalët për të përshkruar ngjyrat më të bukura të shpirtit të tyre artistik.
