Këto ditë janari, në periudhën e manifestimeve me rastin e Flakës së Janarit, na erdhi si një flakadan i ndezur edhe libri me 500 aforizma, të autorit nga Komuna e Bujanocit, Halim Hasani.
Ky është libri i katërmbëdhjetë me radhë i botuar me aforizma, numri të cilave thyen rekordin e botimit të këtij zhanri deficitar të aforistikës shqiptare më 4500 sish, duke e bërë Halim Hasanin, mjeshtër dhe legjendë të krijimit aforizmit, rrugëtim ky i cili synon të mbërrijë deri në numrin 5000, që për letrat shqipe paraqet një thesar të çmuar e me rëndësi letrare e kombëtare.
Libri më i ri i Halim Hasanit, i përbërë nga 500 aforizma, është një dëshmi e fuqisë dhe thellësisë së mendimit të tij, duke e çuar më tej traditën e rrallë të aforistikës shqiptare. Përmes këtij libri, autori shfaq një mjeshtëri të lartë letrare, duke i dhënë jetë mendimeve të përmbledhura në pak fjalë, por me një peshë të madhe kuptimore dhe artistike.
Në këtë vepër, Hasani ndërthur me mjeshtëri ironinë, filozofinë dhe urtësinë popullore, duke krijuar aforizma që jo vetëm argëtojnë lexuesin, por edhe e nxisin për të reflektuar mbi aspekte të ndryshme të jetës, shoqërisë dhe vetë natyrës njerëzore. Secili aforizëm është një thesar i vogël, i ngarkuar me domethënie dhe i ndërtuar me një sintaksë të pastër e elegante, që dëshmon për një ndjeshmëri të thellë artistike.
Libri reflekton një stil të veçantë të të shkruarit, ku çdo fjali ka peshën e një libri të tërë, dhe çdo mendim mund të shërbejë si një udhërrëfyes për lexuesin. Përmes ironisë së hollë dhe të mprehtë, Hasani i bën një analizë të zgjuar shoqërisë dhe kohës që jetojmë, duke vënë në pah kontrastet, paradokset dhe sfidat e saj. Kjo aftësi e tij për të depërtuar në thelbin e realitetit e bën këtë libër jo vetëm një vepër letrare, por edhe një pasqyrë filozofike dhe kritike për kohën tonë.
Kritikët letrarë kanë theksuar se Halim Hasani nuk është vetëm një autor i aforizmave, por një filozof i kohës moderne, që përmes mendimit të thjeshtë dhe të thellë arrin të prekë shtresat më të thella të shpirtit njerëzor. Aforizmat e tij janë të ndërtuara me kujdes, ku fjala dhe kuptimi qëndrojnë në një harmoni të përkryer, duke e bërë çdo aforizëm të paharrueshëm.
Ky libër i ri i shtohet me meritë një serie veprash që kanë vendosur themelet e një zhanri letrar në letërsinë shqiptare. Me këtë arritje, Halim Hasani jo vetëm që thellon kontributin e tij letrar, por edhe vendos një standard të lartë për krijuesit e ardhshëm të këtij zhanri. Për lexuesin shqiptar, ky libër mbetet një ftesë për të medituar, për të qeshur, për t’u sfiduar mendërisht dhe për të zbuluar thesaret e mendimit të përmbledhur në çdo aforizëm.
Vlen të ceket se Halim Hasani, nga Lugina e Preshevës, me botimin e aforizmit, mbetet njëri nga krijuesit më të mëdhenj të këtij zhanri letrar, i cili deri tani ka publikuar këto libra aforistik: “Aforizma të kohës” (1993), pastaj libri tjetër “200 Aforizma” (2005), për të vazhduar me “Aforizma bashkëkohorë” (2008), “Aforizma” (2010), “Fjalë nëpër kohë” (2012), “1021 Aforizma” (2012), “Fjali me inxhi” (2013), “Fjali pa mahi” (2014), “2400 Aforizma” (2016), “600 Aforizma” (2018), kompleti "3000 Aforizma” (2019), “500 Aforizma” (2021), pastaj tjetër “4000 Aforizma (2022) dhe libri i fundi i tij i publikuar këto ditë mban titullin: “Kokën e jap, tokën s’e jap" me 500 Aforizma" (2025), pra gjithsej 4500 aforizma.
Me kaq, nuk përmbyllet rrugëtimi aforistik i Halim Hasanit, i cili vazhdon të merret edhe matej me krijimin e këtij zhanri letrar,shumë të kërkuar në tregun e botimit të librave.
Halim Hasani, vazhdon ta kultivojë dhe ta afirmojë aforizmin shqiptar, këtë gjini deficitare letrare e cila e ka burimin te urtia popullore, e sajuara nëpër shekuj, duke u munduar që në aforizmat e tij, të nxjerr një mësim, një porosi, një këshillë të urtë, si dhe të jap një mesazh të qartë me vlera të mëdha artistike.
