Drejtori i të ashtuquajturës zyrës së qeverisë së Serbisë për Kosovë Petar Petkoviç ka deklaruar se baza e paralajmëruar ushtarake është “kërcënim direkt për serbët në veri”, shkruan “Beta”, transmeton “Bota sot”.
Ai ka përmendur deklaratën e kreut të Mitrovicës, Agim Bahtiri për dhënien në shfrytëzim të tokës Forcës së Sigurisë së Kosovës, që planifikon ndërtimin e bazës në kodrën e cernushës, prej nga shihen katër komunat me shumicë serbe.
Sipas Petkoviç kjo bazë do të jetë “kërcënim direkt për serbët e katër komunave në veri, si ishte edhe deklarata e Bahtirit në vitin 2018 për aneksimin e pjesës veriore të Mitrovicës ku jetojnë me shumicë serbët”, ka deklaruar ai.
Lidhur me paralajmërimin e ndërtimit të bazës ushtarake ka reaguar edhe presidenti Vuçiq duke thënë se “serbët e dinë kush është garant i ekzistencës së popullit tonë në atë territor”, ndërsa Petkoviç ka shtuar se “si duket në Prishtinë e kanë kuptuar porosinë nga Beogradi, që nuk kërcënon por di të mbrojë popullin dhe nuk do lejohen përndjekje apo stuhi” .