Deputetja e Kuvendit të Kosovës nga radhët e Partisë Demokratike, Ariana Musliu –Shoshi, po akuzon deputetët e Vetëvendosjes, për mostransparencë në çështjen e dialogut.
Madje ajo thotë se ndonëse sot propozoi në Komisionin për Punë të Jashtme dhe Diasportë, që zëvendëskryeminsitri Besnik Bislimi, të raportojë për negociatat, një gjë e tillë u refuzua, përcjell klankosova.tv.
”Deputetët e VV-së nuk janë në Kuvend që ta mbajnë qeverinë ne llogaridhënje por janë vetëm votë që mbron qorras qeverinë!
Pas më shumë se një muaj, sot u mbajt mbledhja e Komisionit për Punë të Jashtme dhe Diasporë. Ky komision e ka detyrë që të mbikqyrë procesin e dialogut. Bazuar në këtë të drejtë, si opozitë që nuk kemi ASNJË informacion sa i përket procesit të dialogut nga qeveria, propozova që të ftohet z. Bislimi në raportim në këtë Komision por me shumicë votash nga deputetët e pozitës u REFUZUA.
Pra, z. Bislimi NUK do të raportoj në këtë komision. Se çka do të thotë kjo për demokracinë e këtij vendi le të vlerësoj vet qytetari!”.
