Vëllai i grimeres nga Vushtrria, e cila vdiq si pasojë e infektimit me Covid-19 përmes një postimi në facebook, kanë falënderuar të gjithë qytetarët për ngushëllimet që kanë shprehur këto ditë.
Liberta Selaci ndërroi jetë më 4 shtator pas infektimit me Covid-19 bashkë me foshnjën e saj, shkruan gazeta "Bota sot".
Vëllai i saj Mek Selaci thotë se përjetimi i tyre në këto javë ishte vet tmerri.
Ai kërkon që të vaksinohen qytetarët e Kosovës, derisa uron që mos e përjetoftë askush dhimbjen që e kanë përjetuar vet ata.
Postimi i plotë:
Të nderuar dashamirë nga e gjithë Kosova dhe mërgata
Po e shfrytëzoj rastin që përmes këtij postimi, të ju falenderoj për ngushllimet e bashkndjenjen që treguat e po tregoni për familjen tonë.
Falë besimit të pathyeshëm në Zotin fuqiplotë dhe përkrahjen tuaj, ne po e kalojmë këtë humbje shumë më lehtë se sa që mund ta imagjinojë ndokush.
I falemnderohemi të Gjithëfuqishmit All-llah, që pjesa tjetër e familjes jemi shëndosh e mirë.
Jemi tejet mirënjohes që kishim fatin që Liberta ishte dhe është bija jonë, për të cilën do të ndihemi krenarë tërë jetën.
Vdekja e saj le të shërbej për gjithë neve si mesazh vetëdijesimi për respektimin e masave mbrojtëse nga ky virus.
Ju lutemi, kujdesuni për vetën tuaj dhe për gjithë ata që ju rrethojnë.
Ajo çfarë kemi parë e përjetuar në këto javë, është vetë tmerri.
Ju lutem, ju lutem deri në qiell, mos e neglizhoni këtë gjendje, mos e nençmoni këtë pandemi.
Vaksinohuni!
Urojmë qe më askush të mos përjetojë dhimbje e lot nga kjo situatë e mallkuar!
Me dashuri për të gjithe ju,
Familja Selaci
