Drejtori i Zyrës Serbe për Kosovën, Petar Petkoviq, deklaroi se kryeministri i Kosovës, Albin Kurti më në fund ka pranuar ekzistencën e arkivave të UÇK dhe se është gati t’i hapë ato.
Sipas tij, kjo është mënyra e vetme që siç tha ai "ne do të bëjmë ndryshimin e shumëpritur në sqarimin e fatit të 1,600 personave të zhdukur", raporton Tanjug.
Petkoviq deklaroi mes tjerash se “Beogradi është një partner absolutisht i besueshëm në përmbushjen e të gjitha detyrimeve të tij nga dialogu dhe një bashkëbisedues në bashkëpunimin në fushat që përfaqësojnë trashëgiminë e qytetërimit, siç është edhe kërkimi i të zhdukurve”.
Kryeministri Albin Kurti deklaroi se Kosova nuk ka se çfarë të fsheh për të kaluarën e saj, sidomos duke qenë nën administrimin ndërkombëtar me misionet e UNMIK-ut dhe EULEX-it e me Tribunalin e Hagës, prandaj shtoi se tashmë është radha e Serbisë që të hap arkivat.
