Drejtori i zyrës (së ashtuquajtur) për Kosovë, Petar Petkoviç, vlerësoi se presidentja e Kosovës Vjosa Osmani nuk e ka kuptuar mirë kur nga Departamenti i Shtetit dhe ambasada në Prishtinë erdhën porositë se Prishtina duhet të formojë asociacionin e komunave serbe, shkruan media serbe, transmeton “Bota Sot”.
Këtë reagim Petkoviç e bëri pas deklaratës së Osmanit se formimi i asociacionit të komunave në Kosovë do të thoshte formim i Republika Srpska edhe në Kosovë.
“Duket se porositë që vijnë nga ShBA për Osmanin kanë rëndësi të pjesshme, sikurse edhe për të edhe për Kurtin, vetëm disa respektohen ashtu sikurse edhe marrëveshjet e nënshkruara deri tash në Bruksel”, tha Petkoviç.
“Po të kishte lexuar Vjosa Osmani kumtesën e 21 tetorit dhe 4 nëntorit nga fillimi deri në fund dhe me mirëkuptim, do të mbante në mend se ShBA-të angazhohen për respektimin e të gjitha marrëveshjeve të arritura ndërmjet Beogradit edhe Prishtinës, pa arsyetime edhe përjashtim, ku përfshihet edhe formimi i asociacionit të komunave”, kumtoi zyra që drejtohet nga Petkoviç.
Në kumtesën e lëshuar nënvizohet se për shkak të sigurisë dhe gjumit të qetë të qytetarëve, Serbia kurrë nuk do të heq dorë nga përpjekja për formimin e asociacionit të komunave në Kosovë.
