Sot në Beograd është mbajtur takimi trepalësh i Zëvendës Ndihmës Sekretarit Amerikan të Shtetit dhe të dërguarin special për Ballkanin Perëndimor Gabriel Escobar, Përfaqësuesit Special të Bashkimit Evropian për dialogun Kosovë-Serbi dhe çështje të tjera rajonale në Ballkanin Perëndimor Miroslav Lajçak dhe ministrit e jashtëm serb Nikolla Selakoviq.
Me këtë rast, shefi i diplomacisë serbe ka thënë se “Serbia është e vendosur në rrugën e integrimeve evropiane, se është plotësisht e përkushtuar në procesin e reformave dhe përmirësimin e të gjitha segmenteve të shoqërisë serbe” dhe se “shpreson që një angazhim i tillë do të jetë valorizuar duke hapur grupe negociuese”, ka kumtuar Ministria serbe e Jashtme.
Selakoviq gjithashtu ka folur për “përkushtimin serb “të sinqertë” për bashkëpunimin rajonal, ruajtjen e stabilitetit dhe zgjidhjen diplomatike të çështjeve të hapura”, duke pretenduar se paqja dhe stabiliteti janë “interesi më i lartë i Serbisë” dhe kusht për vazhdimin e progresit të saj.
Ata diskutuan edhe për çështjet rajonale, ndërsa ministri Sellakoviq thënë se “Serbia është e qëndrueshme që të mos ndërhyjë në punët e brendshme të vendeve fqinje dhe është e vendosur në qëndrimin se të gjitha mosmarrëveshjet duhet të zgjidhen përmes dialogut politik demokratik”.
Sa i përket dialogut ndërmjet Kosovës dhe Serbisë, ministri serb u ka thënë se “ne jemi të gatshëm të vazhdojmë dialogun dhe të hapur për arritjen e një marrëveshjeje kompromisi që do të jetë e pranueshme për dyja palët”.
Sellakoviq ka pretenduar se “Beogradi i ka përmbushur pothuajse të gjitha obligimet nga dialogu, ndërsa Prishtina, edhe gati nëntë vjet pas arritjes së marrëveshjes së Brukselit, nuk e ka përmbushur pjesën kryesore të saj, që është formimi i Asociacionit të Komunave me Shumicë Serbe”.
Ministri “falënderoi” bashkëbiseduesit e tij për angazhimin e tyre personal në këtë proces, por gjithashtu paralajmëroi për “rrezikun e përpjekjeve të vazhdueshme të Kosovës për ta bërë dialogun të pakuptimtë dhe për të destabilizuar rajonin me lëvizje të njëanshme”.
