Serbët e Kosovës kanë protestuar sot në Mitrovicë të Veriut dhe në Graçanicë afër Prishtinës, kundër vendimit të Qeverisë së Kosovës për të mos lejuar mbajtjen e zgjedhjeve parlamentare dhe presidenciale serbe në Kosovë, më 3 prill.
Përveç tjerash pjesë e protestës ishte edhe ministri për Kthim dhe Komunitete, Goran Rakiq. Ky i fundit ka deklaruar se ata do të ngrijnë pozitat e tyre në Qeverinë e Kosovës derisa të shfuqizohet vendimi për suspendimin e gjykatës serbe, Liljana e cila mori pjesë në takimin e Këshillit të Sigurisë në Beograd ku është takuar me presidentin serb, Aleksandër Vuçiq.
Për Gazmir Racin, njohësin e çështjeve politike në vend dhe rajon, serbët e Kosovës po vazhdojnë të dirigjohen nga Beogradi dhe për interesat e tyre po përdoren si vegla për të arritur qëllimet.
“Është fatkeqësi që serbët e Kosovës ende janë vegël e pushteteve politike në Serbi. Populli serb i Kosovës më mirë do ishte të angazhohet në shtetin e Kosovës për të rregulluar jetën e tyre të përditshme dhe të jenë pjesë e zhvillimeve socioekonomike, se sa të ndihmojnë qendrimin e Vuçiqit atje në pushtet”, tha Raci për Gazetën “Bota sot”.
Sipas tij kjo politikë e Serbisë tregon shumë për orientimin e saj dhe se ajo duhet të sillet ndryshe në raport me Kosovën, sepse rruga e saj për në BE, kalon përmes Kosovës.
“Serbia duke qenë se është në rrugën e saj drejtë integrimit në Bashkimin Evropian, duhet të sillet edhe si evropiane në raport me Kosovën dhe fqinjësinë e mirë dhe bashkëpunimin rajonal. Serbia nuk mund të bëhet anëtare e BE-së në qoftëse ende sillet si hegjemon në Ballkan. Ka kaluar koha e hegjemonëve me rastin e bombardimeve të NATO-së në vititn 1999”, tha Raci.
