Drejtori i Zyrës Qeveritare të Serbisë për Kosovën, Petar Petkoviq, ka reaguar pas vizitës së ministrave, Xhelal Sveçla dhe Armend Mehajt në Jarinjë dhe Brnjak.
Petkoviq e cilësoi këtë si një provokim që synon të detyrojë reagimin e serbëve në veri të Kosovës, raporton Kosovonline, përcjell "Bota sot".
Gjithashtu, ai thekson se ky është vetëm një kontribut tjetër në politikën e Kurtit për destabilizimin e rajonit.
“Njerëzit që shpikin teza për Serbinë si kërcënim për sigurinë çdo ditë, nuk e humbasin rastin të punojnë aktivisht në destabilizimin dhe provokimin e serbëve në veri të Kosovës, dhe për këtë arsye presim që faktorët ndërkombëtarë politikë dhe të sigurisë në terren të reagojnë. Prania e Ushtrisë së Kosovës në veri, e cila shoqërohet nga ministri i tyre është absolutisht e papranueshme”.
Ai po ashtu thekson se nuk habitet që Prishtina nuk respekton marrëveshjet dhe kontratat, por se pret që përfaqësuesit e forcave ndërkombëtare të sigurisë të reagojnë për të parandaluar dhe dekurajuar provokime të tilla.
“Kërkojmë që KFOR-i të sanksionojë provokimet dhe demonstrimet e forcës të rrezikshme dhe të papërgjegjshme të Prishtinës, sepse incidente të tilla kanë potencial të ndezshëm dhe mund të shkaktojnë pasoja të pakontrolluara dhe të paparashikueshme”, tha Petkoviç.
