Një ngjarje e rëndë ka ndodhur sot rreth orës 12:20 në lagjen Arbana në Prizren, ku një person ka humbur jetën si pasojë e lëndimeve që ka marrë në vendin e tij të punës.
Merret vesh se bëhet fjalë për Fadil Bytyqin.
Rastin e ka konfirmuar togeri i Policisë së Kosovës në Prizren, Shaqir Bytyqi, i cili tha se viktima është 51-vjeçar dhe i njëjti kishte qenë duke kryer punë fizike.
Sipas Bytyqit, i ndjeri ka rënë nga një lartësi, teksa vdekjen e ka konfirmuar ekipi mjekësor që doli në vendin e ngjarjes menjëherë pasi ka ndodhur rasti.
“Rreth orës 12:20, në periferi të Prizrenit, në lagjen Arbana, një punëtor fizik i moshës 51-vjeçare, derisa ka qenë duke punuar në një objekt, ka ra nga objekti. Ekipi mjekësorë ka dalë në vendin e ngjarjes dhe ka konstatuar vdekjen. Njësitë policore kanë dalë në vendin e ngjarjes dhe janë duke u marrë me rastin”, tha ai.
