Ministri i Punëve të Jashtme të Greqisë, Nikos Dendias ka thënë se ka biseduar me emisarin evropian, Mirsolav Lajçak rreth dialogut Kosovë-Serbi dhe tensioneve që janë rritur javëve të fundit.
Përmes një shkrimi në llogarinë e tij në Twitter, Dendias ka thënë se me Lajçak kanë biseduar për hapat që janë ndërmarrë në mënyrë që të ulen tensionet.
“Duke folur për vizitat e mia në Ballkanin Perëndimor këtë javë, pata një bisedë telefonike më herët me emisarin evropian Mirsolav Lajçak rreth dialogut Kosovë-Serbi dhe përpjekjet e ndërmarra për të ulur tensionet në veri të Kosovës.” – ka shkruar ai.
Ndërkohë, sot janë bërë 10 ditë që prej vendosjes së barrikadave në rrugët kryesore të Leposaviqit, Zveçanit e Zubin Potokut.
Nuk dihet se kur do të bëhet heqja e barrikadave, derisa Qeveria e Kosovës është në pritje të KFOR-it për këtë.
Në anë tjetër mediat serbe kanë raportuar se nxënësit e shkollave fillore do të kthehen sot në mësim teksa ata të arsimit të lartë do të zhvillojnë mësimin online.
