Kryeministri i Malit të Zi për gazetën malazeze Vijesti, ka thënë se me presidentin e Serbisë, Aleksandar Vuçiq, ka raporte korrekte dhe se ndikimi i tij në Mal të Zi është i ekzagjeruar.
Abazoviq thotë se është sulmuar për shkak të Vuçiqit.
“Vazhdimisht jam i sulmuar se Vuçiç po menaxhon diçka këtu, këto gjëra i refuzoj, i konsideroj joserioze”, deklaroi Abazoviq.
“Marrëdhënia ime me Vuçiqin është shumë korrekte dhe miqësore”, tha ai.
Ai ka thënë se më të gjithë liderët e rajonit ka kontakte dhe marrëdhënie të mira.
“A na pëlqen ndonjë opsion politik në rajon apo jo, nuk është çështja jonë dhe nuk është çështje e qytetarëve tanë. Ne kemi pushtet sovran, i respektojmë të tjerët, në të njëjtën mënyrë dhe kaq. E gjithë kjo bisedë për Vuçiç-in është në kontekstin e krijimit të një narrative politike negative në raport me mua personalisht. Më vjen mirë që me të, me kryeministrin e Shqipërisë, të Kosovës dhe me kryetarin e Këshillit të Bosnjë-Hercegovinës kemi marrëdhënie që duhet të ketë çdo kryeministër i Malit të Zi”, ka thënë ai.
Abazoviq shtoi se sa i përket Vuçiqit, “mendoj se perceptimi i ndikimit të tij në Mal të Zi është i mbivlerësuar”.
