Ministri i Punëve të Jashtme, Ivica Daçiç gjatë një intervistë për Zërin e Amerikës, deklaroi se SHBA dhe Bashkimi Evropian, kanë ndryshuar politikën e tyre ndaj Serbisë pasi e vlerësojnë si konstruktive dhe përgjegjëse qasjen ndaj dialogut të Kosovës.
Daçiç tha se Perëndimi tani është pajtuar me dy vija të kuqe, çështjen e njohjes së Kosovës, pra çështjen e anëtarësimit të Kosovës në Kombet e Bashkuara dhe, siç tha ai, “një parakusht për të gjitha parakushtet” që së pari të themelohet Asociacioni i Komunave me shumicë serbe në Kosovë.
“Është diçka për të cilën realisht nuk kemi nevojë të diskutojmë apo negociojmë përsëri, sepse është diçka për të cilën ndoshta jemi pajtuar kur e kemi nënshkruar atë marrëveshje 10 vjet më parë”, tha shefi i diplomacisë serbe.
Kryediplomati serb tha se gjëja më e rëndësishme gjatë vizitës së tij në Washington ishin bisedimet në Departamentin e Shtetit, me këshilltarin e lartë, Derek Chollet dhe emisarin special për Ballkanin Perëndimor, Gabriel Escobar.
“Këtu kam dëgjuar se shprehen pozitivisht për Serbinë dhe vetë thonë se qëndrimi i QUINT-it, përfshirë edhe SHBA-në, ka ndryshuar shumë në raport me këtë pozicionim të Serbisë, gjë që tregon se ka qenë një vendim i drejtë”, tha ai.
Presioni i SHBA-ve dhe BE-së është rritur kohët e fundit si në Prishtinë, ashtu edhe në Beograd, të cilët po kërkojnë nga palët ta nënshkruajnë propozimin evropian për normalizimin e marrëdhënieve, mirëpo ai prentendoi se s’ka më nevojë t’i bëhet presion palës serbe.
“Këtë duhet ta bisedojnë me Prishtinën që të pranojnë se po zbatojnë diçka që e kanë nënshkruar dhjetë vjet më parë. Pra, ky është një ndryshim i madh në qasje. Nuk ka dyshim që pozicioni ynë atje është i mirë, por temat për të cilat flasim janë të vështira dhe të bazuara në disa gjëra që mendoj se janë shumë të vështira për t’u diskutuar”, shtoi ai.
