Një aksident tragjik ndodhi mbrëmjen e së hënës në Greqi ku një tren udhëtarësh që u përplas me një tren mallrash në dalje të Larisas dhe më pas doli nga shinat. Kathimerini shkruan se numri i viktimave ka shkuar në 36. Ndërkohë 85 persona mbetën të plagosur. 66 të plagosur ndodhen ende në spital, 6 prej të cilëve në gjendje kritike.
Ministrja për Europën dhe Punët e Jashtme të Shqipërisë njoftoi mëngjesin e së martës se deri më tani nuk ka ende informacion për shqiptarë në radhët e viktimave apo të plagosurve si pasojë e aksidentit.
” Të trishtuar nga aksidenti tragjik që ndodhi në Tempe në Greqi nga përplasja e dy trenave. Mendimet dhe lutjet tona shkojnë për viktimat dhe familjet e tyre të këtij aksidenti vdekjeprurës. Shërim sa më të shpejtë të plagosurve!“, thuhet në njoftim.
Ministria e Jashtme informoi se është në komunikim të vazhdueshëm me ambasadën në Athinë dhe Konsullatën e Përgjithshme në Selanik lidhur me aksidentin.
