Disa incidente të njëpasnjëshme kanë ndodhur ditët e fundit në komunat veriore të banuara me shumicë serbe. Tetë vetura të serbëve lokalë, shtatë prej tyre me targa RKS, janë përfshirë nga zjarri dhe për këtë dje sot është arrestuar një person i dyshuar.
Mësohet se i dyshuari është Milovan Bozoviç, 36-vjeçar.
Bozoviç sipas njoftimit të Policisë, dyshohet se është përfshirë edhe në sulmin ndaj Policisë së Kosovës muaj më parë, ku si pasojë kishin mbetur të plagosur dy zyrtarë policorë.
I njëjti po dyshohet se u ka vënë flakën disa veturave në Zubin Potok.
Sipas ministrit të Brendshëm, Xhelal Sveçla, 36-vjeçari ishte pjesë aktive e strukturës kriminale të të ashtuquajturës “Mbrojtje Civile”.
Sipas Policisë, shtetasi serb i arrestuar sot akuzohet për “Pjesëmarrje ose organizim i grupit kriminal të organizuar”, “Vrasje në tentativë”, “Shkaktim i rrezikut të përgjithshëm” dhe “Sulm ndaj personit zyrtar gjatë kryerjes së detyrës zyrtare”.
