Ish-drejtori i BIA-s serbe dhe njeriu që ndodhet në listën e zezë amerikane, Aleksandar Vulin, ka insinuuar sërish duke thënë se entiteti i Republika Serbe do të shkëputet nga Bosnja dhe Hercegovina.
Republika Srpska do t’i bashkohet shumë shpejtë shtetit të Serbisë, deklaroi themeluesi i Lëvizjes Socialiste, Vulin.
Ky i fundit tha se atë që fuqitë perëndimore ua lejuan shqiptarëve në Kosovë, nuk do të mund t’ua ndalojnë serbëve në Bosnje, raporton N1.
“Procesi i bashkimit të serbëve ka filluar dhe nuk mund të ndalet”, tha ai.
Më pas, ai kujtoi periudhën e vitit 2008 dhe prezantoi pikëpamjet për ngjarjet e asaj kohe.
“Në vitin 2008, Serbia ishte në derën e paktit të NATO-s, nën kontrollin e plotë të BE-së dhe në marrëdhënie asnjëherë më të këqija me Rusinë dhe Kinën, dhe në këmbim mori privatizimin grabitqar dhe shpalljen e pavarësisë së Kosovës”, tha Vulin.
Ndryshe, Vulin edhe në të kaluarën ka bërë kërcënime të ngjashme dhe retorikë patriotike.
