Evidentimi ditor i rasteve të reja të dhunës në familjes, është shndërruar në një rutinë të pandashme, pasi që çdo ditë e më shumë raportohen me dhjetëra raste të dhunës, ku viktima zakonisht janë gratë që pësojnë nga personat të cilët i kanë zgjedhur që të ndajnë jetën me ta.
Ndihmën e Policisë e ka kërkuar edhe një grua në Ferizaj, viktima ka njoftuar autoritetet për kërcënime dhe dhunë psikologjike nga bashkëshorti i saj.
Mësohet se viktima është kanosur përmes telefonit nga i dyshuari me fjalët – “Tash do të vij në shtëpi dhe do të mbys, ty dhe veten”.
Viktima ka shtuar se kërcënimet janë shoqëruar edhe me dhunë psikologjike.
Pas raportimit, në vendngjarje kanë mbërritur dy njësi patrulluese të Policisë, të cilat kanë shoqëruar në stacion të dyshuarin dhe viktimën.
I dyshuari është intervistuar dhe pas konsultimit me prokurorin kujdestar është ndaluar për 48 orë dhe se autoritetet janë duke vazhduar hetimet për rastin.
