Presidenti i zgjedhur amerikan Donald Trump është duke menduar që Richard Grenelli, ish-shefi i inteligjencës amerikane dhe përfaqësues në dialogun mes Kosovës dhe Serbisë, të jetë përfaqësues special për Iranin, ka raportuar agjencia e lajmeve “Reuters”.
“Ai është kandidat [për atë pozitë]”, ka thënë një person i afërt me emërimet e Trumpit.
Enden nuk është marrë asnjë vendim ose strategjinë që do ta përdorë Trumpi karshi Iranit, përfshirë nëse do të ketë sanksione të reja ndaj Republikës Islamike.
Planet e Trumpit për këtë rol nuk janë raportuar më parë. Ekipi i presidentit të zgjedhur dhe Grenelli nuk ka komentuar në lidhje me këtë.
“Richard Grenell është person i mrekullueshëm, është yll. Ai do të ketë një pozitë diku lart”, ka shkruar Trumpi në rrjetin e vet social pas raportimit nga Reutersi.
Grenelli ka reaguar në “X” duke e cilësuar raportin si të gabuar, por nuk ka ofruar detaje.
Në rast të emërimit të Grenellit, Trumpi do të dërgojë mesazh në rajon se presidenti i ri amerikan mund të nisë bisedimet me Iranin të cilin e ka kërcënuar pasi u zbulua se Garda Revolucionare po bënte plan për vrasjen e tij.
Në këtë rol, Grenelli pritet të jetë i angazhuar në bisedimet me shtetet përreth Iranit dhe të testojë shtetin për negociatat e mundshme.
Ndërkaq, presidenti i Iranit, Masoud Pezeshkian, i cili ka qëndrime më të moderuara, pas zgjedhjes së Trumpit ka deklaruar se Teherani duhet të përballet me SHBA-në dhe të menaxhojë marrëdhëniet me fuqinë amerikane.
