Ministri i Shëndetësisë, Venko Filipçe ka reaguar ndaj deklaratës së presidentit të shtetit, Stevo Pendarovski se, “atë që e kemi parë gjatë fundjavës në Serbi, ku janë vaksinuar qytetarë tanë është turp për vendin dhe nuk guxon të përsëritet”.
“Jam i befasuar nga deklarata e presidentit Stevo Pendarovski. Pamjet nga Serbia nuk janë turp, por shprehje e solidaritetit në kushte krize. Krahas qytetarëve tanë janë vaksinuar edhe qytetarë të shteteve fqinje, por asnjë president nuk tha se kjo është turp për vendin e tyre”, ka thënë Filipçe në reagimin me shkrim.
Ai shton se qeveria bën përpjekje maksimale të sigurojë vaksina, ndërsa vaksinimi fillon veçmë prej nesër.
“Presidenti i shtetit si institucion poashtu do të duhej të luajë rol të rëndësishëm në gjithë këto procese të furnizimit. Për fat të keq mbështetja konkrete nga Pendarovski mungoi”, ka thënë Filipçe.
