Kryetari i Kuvendit të Maqedonisë Talat Xhaferi, sot në konferencë për shtyp tha se ka ftuar koordinim të jashtëzakonshëm me koordinatorët e grupeve të deputetëve.
Në lidhje me Ligjin për regjistrimin, Xhaferi tha se fillimisht duhet të votohet nevoja për ndryshimin e tij, i cili më pas duhet të dërgohet në komision. Xhaferi shtoi nuk mund të parashikojë sa do të zgjasë debati dhe se kjo nuk është përgjegjësi e tij.
“Nga kjo konferencë do të vazhdojë dinamika e punës së Kuvendit. Prej ditës sotme kam pranuar dy projekt ligje që i kanë paralajmëruar deputetët dhe Qeveria. I kam shqyrtaur dhe për aspekte formale, të dy projekt-ligjet janë kthyer propozuesve, të cilët duhet të plotësohen dhe shpresoj që orëve në vazhdim lëshimet formale do të anashkalohen”.
“I pari është Ligji për regjistrimin e popullsisë, i cili nuk i kishte të gjitha aspektet formale, me siguri për shkak të kohës së ngushtë dhe shpejtimit që kanë bërë propozuesit. I njëjti është kthyer tek propozuesit për të mënjanuar lëshimet formale-teknike. Propozim-ligji tjetër është ai për ndryshimet në Kodin Zgjedhor, i cili poashtu ka lëshime formale”, tha Xhaferi.
Ai tha se në Kuvend ka shumë seanca të papërfunduara, disa për shkak të amendamenteve dhe disa në të cilat pritet të votohet.
