Nëse Maqedonia Veriore i përmbush të gjitha kushtet në rrugën drejt Bashkimit Evropian, atëherë BE duhet të përmbushë pjesën e saj të marrëveshjes në mënyrë që të parandalojë shfaqjen e “non papers” të ndryshëm, të cilat propozohen për të rishikuar kufijtë, tha kryeministri Zoran Zaev.
"Nëse i plotësojmë kushtet, Evropa gjithashtu duhet t'i përmbushë ato - ne duhet të vazhdojmë procesin në të dy palët, sepse “non papers” dhe diskutimet rreth kufijve të rinj po shfaqen, dhe fëmijët e dinë se kjo është e mundur vetëm me pushkë dhe armë. Ne nuk na duhet kjo, sepse ky është shekulli 21", tha Zaev.
Ai shfaqi bindjen se nëse BE nuk i merr seriozisht proceset, kjo do të krijojë një terren të përshtatshëm për “non papers” të reja dhe strategji të ndryshme që njerëzit e kësaj zone nuk duan.
Zaev gjithashtu i tha Euronews Albania, se Ballkani ka ndryshuar me të vërtetë për shkak të së ardhmes evropiane që të gjithë e dëshirojnë.
"Përveç kësaj, është shumë e rëndësishme që Maqedonia Veriore të jetë provë se shoqëritë multietnike mund të jenë një avantazh i madh, një mësim dhe një shembull për të gjitha vendet e tjera", tha Zaev.
Ai vlerësoi se nacionalizmi dhe shovinizmi ekzistojnë kudo në botë, por ato janë të dukshme në Ballkan dhe kjo është arsyeja pse "ata nuk duhet të ushqehen, sepse shkatërrojnë perspektivat e brezave të ri".
"Të gjithë kemi një ndjenjë të veçantë kombëtare, por të gjithë jemi të detyruar t'ua lëmë fëmijëve tanë të ardhmen evropiane, kështu që unë besoj në unitetin e dallimeve, i cili është simbol i BE-së," tha kryeministri i Maqedonisë Veriore.
