Ministri i Shëndetësisë Venko Filipçe, ka folur në lidhje me akuzat se në ndryshimet e reja ligjore që ndodhen në procedurë kuvendare, është propozuar edhe privatizimi i Ndihmës së Shpejtë.
Ai thotë se nuk bëhet fjalë për privatizim, duke shtuar se këto pohime janë spin politik. Filipçe thekson se sipas ligjit, ndihma e shpejtë mjekësore mund të ofrohet vetëm nga institucioni publik shëndetësor.
Filipçe ka theksuar se përveç institucionit publik shëndetësor, ndihmën emergjente mjekësore dhe stomatologjike e ofrojnë edhe institucionet private “Neuromedika”, “Zhan Mitrev Klinik”, ndërsa tani fillon edhe “Nikob”.
“Ne vetëm legjitimojmë atë që në fakt po ndodh në terren. Transportin privat që telefonojnë tani qytetari, e paguajnë nga xhepi i tyre dhe kështu do të vazhdojë. Fondi i Shëndetësisë nuk do t’i marrë këto përgjegjësi”, tha Filipçe.
Ai ka sqaruar se qytetarët nuk do të kenë shpenzime që nuk i kanë pasur deri më tani.
“Tashmë e kemi vënë në ligj atë që ka vite që po ndodh në terren. Ku është privatizimi këtu?”, thotë Filipçe.
