Katër muaj pas fillimit të strategjisë së re për bashkëpunim me Bullgarinë, në më shumë fusha dhe me dinamikë më të madhe, dy qeveritë ende janë në fazën e “shkëmbimit të ideve”.
Kryeministri i Maqedonisë së Veriut Dimitar Kovaçevski në bisedë për Agjencinë “AIM” thotë se “ende nuk ekziston dokument i përbashkët i pranueshëm”, që do të miratohej nga Sofja dhe nga Shkupi në mënyrë që të zhbllokohet rruga evropiane e vendit.
Në forumin ekonomik në Delfi, Greqi, Kovaçevski ka theksuar se SHBA-të dhe BE-ja sërish janë angazhuar për përshpejtim të procesit, por përmes tejkalimit të çështjeve të hapura politike me Bullgarinë fqinje.
U organizuan një sërë takime të grupeve maqedonase-bullgarë të punës për bashkëpunim më të mirë në transport, kulturë, arsim, është vendosur linja e fluturimit në mes dy kryeqyteteve, por dallimet kryesore në mes Sofjes dhe Shkupit vazhdojnë të mbeten, me këtë edhe bllokada e negociatave aderuese e Maqedonisë së Veriut dhe e Shqipërisë me Bashkimin Evropian.
Kryeministri Dimitar Kovaçevski, në intervistë për “AIM” thotë se në forumin në Delfi, Greqi, është përsëritur angazhimi i BE-së dhe SHBA-ve për përshpejtim të procesit, por me tejkalim të kontestit dypalësh.
“Për momentin, si edhe në periudhën e kaluar, procesi është në nivel të shkëmbimit të ideve dhe ende nuk ekziston dokument i përbashkët i pranueshëm, i cili do të mund të ndahet për miratim në të dyja shtetet në nivel të institucioneve të cilat duhet ta bëjnë këtë”, tha Kovaçevski.
Presidenti bullgar Rumen Radev dje i ka këshilluar këshillëtarët e Kryeministrit Kiril Petkov të mos bien pre e kushteve të vendosura, por e rezultateve të negociatave. Çdo lëshim nga interesi kombëtar bullgar do të shkaktojë krizë të re të Qeverisë, paralajmëroi Radevi.
