Me përfundimin e masave anti-krizë nga Qeveria e Maqedonisë, është vërejtur dukshëm rritja e çmimeve nëpër shitoret me produkte ushqimore dhe jo vetëm.
Bizneset ankohen se çmimet e larta sjellin përkeqësim të qarkullimit financiar, ndërsa qytetarët ankohen se me pagat e vendit çmimet e produkteve janë të papërballueshme.
Në Maj inflacioni arriti 12%, kurse ushqimi është shtrenjtuar për 17%, krahasuar me muajin e njëjtë të vitit të kaluar.
Këto shifra flasin për përiudhën sa masat anti-krizë të Qeverisë për kufizimin e cmimeve të produkteve ushqimore ishin në fuqi, ndërsa pas heqjes së masave, çmimet u rritën jashtë çdo normaliteti.
Në Qershor u ndërpre ulja e akcizës dhe TVSH-së për karburantet që rezultoi me rritje të ndjeshme të derivateve të naftës.
Nga 09 Qershori, ЕUROSUPER BS – 95 shitet për 110 denarë, EUROSUPER BS – 98 për 112, EURODIZELI për 104.5 kurse Vaji Ekstra I Lehtë 102,5 denarë.
U shfuqizua edhe ulja e TVSH-së dhe kufizimi i marzhës së produkteve themelore të ushqimit.
Vaji i gatimit u rrit për 25 denarë, sheqeri për 8, mielli dhe qumështi për 9 denarë, thonë të dhënat e portalit të specializuar cenometar.mk.
Disa prodhime janë shtrenjtuar për 70%.
Qytetarët ankohen se mezi e kalojnë muajin.
Qeveria paralajmëroi se në përgatitje e sipër është pakoja e re e masave anti-krizë, që do të miratohet pas votimit të ribalancit të buxhetit dhe të njejtat mund të shfrytëzohen vetëm nga kategoritë me rrezik social.
