Samiti i OSBE-së në Shkup/ Ministrja gjermane ‘godet’ Lavrovin – Daçiq përmend Kosovën

Diplomatët perëndimorë dhe ministri i Jashtëm i Rusisë, Sergei Lavrov, e akuzuan njëri-tjetrin për shkatërrimin e Organizatës për Siguri dhe Bashkëpunim në Evropë (OSBE) të enjten në Shkup. Një pjesë e delegacioneve e bojkotuan fjalimin e kryediplomatit rus në Shkup dhe i kërkuan Kremlinit ta ndalë luftën në Ukrainë.

Samiti i OSBE-së në Maqedoni të Veriut la në hije temat e takimit në ditën e parë të tij si, korrupsioni dhe ndryshimet klimatike, pasi pjesëmarrësit në fokus kishin agresionin rus në Ukrainë dhe përpjekjet e Moskës për “rrënimin e parimeve dhe ekzistimin e organizatës”.

Pothuajse të gjithë diplomatët perëndimorë, që folën në ditën e parë të samitit që nisi sot dhe do të përfundojë nesër më 1 dhjetor, e dënuan Rusinë për shkak të pushtimit të paprovokuar të Ukrainës, që e nisi vitin e kaluar, dhe synimet e saj për destalizimin dhe shtrirjen e ndikimit në rajonin e Ballkanit Perëndimor dhe më gjerë.

Dënimit të politikës konfliktuoze të Kremlinit iu bashkua edhe ndihmëssekretari amerikan i Shtetit për Çështje Evropiane dhe Euroaziatike, James O’Brien.

Ministri i Punëve të Jashtme të Serbisë, Ivica Daçiq, shfrytëzoi samitin e sotëm të OSBE-së që po mbahet në Shkup e ku po marrin pjesë diplomatë të 57 vendeve anëtare të organizatës, që të flasë kundër Kosovës.

Ai edhe aty vazhdoi propagandën e Serbisë se në Kosovë po diskriminohen serbët dhe se kjo është një shqetësim i thellë.

“Serbët në Kosovë po përballen me forma gjithnjë e më të rënda të diskriminimit institucional dhe fetar. Do të përmend vetëm disa nga problemet aktuale me të cilat po ballafaqohet populli ynë në Kosovë, të drejtën për të votuar dhe për të marrë pjesë në zgjedhjet e ardhshme parlamentare në Serbi ia kanë hequr institucionet në Prishtinë”, tha Daçiq, raporton Tanjug.

Sipas tij, gjendja e sigurisë është “një arsye për shqetësim të thellë”.

Ndihmëssekretari amerikan i Shtetit për Çështje Evropiane dhe Euroaziatike, James O’Brien, në samitin e Organizatës për Siguri dhe Bashkëpunim në Evropë (OSBE), që po i zhvillon punimet në Shkup, i ka bërë thirrje Rusisë që t’i japë fund shkeljes së parimeve të OSBE-së.

“Unë shtoj zërin tim, me atë të kolegëve, të cilët i bëjnë thirrje Rusisë, që t’i japë fund shkeljes së parimeve bazë të kësaj organizate, por nuk jam i sigurt nëse ajo është ende e gatshme të na dëgjojë”, ka thënë O’Brien.

Ai ka theksuar se pavarësisht atyre shteteve që janë përpjekur të bllokojnë punën e organizatës, OSBE-ja do të vazhdojë të funksionojë.

“Tani është zgjedhje e shteteve që janë përpjekur të bllokonin punën e kësaj organizate, për të parë gatishmërinë e tyre nëse do të qëndrojnë me komunitetin e civilizuar, bazuar në aktin final të Helsinkit, apo duan të vazhdojnë pengesat e tyre. OSBE-ja do të jetë mirë, prapëseprapë, por, ka rëndësi për ta të zgjedhin, nëse do të vazhdojnë të jenë me ne në këtë përpjekje”, ka deklaruar O’Brien.

Në samitin e OSBE-së po marrin pjesë diplomatë të 57 vendeve anëtare të organizatës, përfshirë shefin e diplomacisë ruse, Sergei Lavrov.

Ministrja gjermane e Punëve të Jashtme, Annalena Baerbock, në fjalimin e saj në samitin e OSBE-së në Shkup ka reaguar për mungesën e pranisë së ministrit të Jashtëm rus, Sergei Lavrov, derisa po mbante fjalimin e saj para pjesëmarrësve të samitit.

“Kësaj here në këtë sallë është e përfaqësuar edhe Rusia, edhe pse jo ministri i saj, i cili ka ardhur vetëm për të folur e jo për të dëgjuar të tjerët, unë ju them – ndaloni këtë luftë, e cila është e drejtuar edhe kundër OSBE-së”, ka deklaruar Baerbock.

Ajo ka theksuar se kjo nuk kërkon negociata, lëshime nga Ukraina, por vetëm një vendim të Rusisë për të respektuar parimet e OSBE-së dhe tërheqjen e trupave të saj.

Baerbock u ka bërë thirrje të gjitha vendeve anëtare, të cilat duan të dëgjojnë, që të bëjnë gjithçka për të ruajtur efektivitetin e OSBE-së përmes një vendimi të përbashkët në favor të rendit evropian të sigurisë.

Ndër tjerash, Baerbock ka thënë se bashkëpunimi në kuadër të organizatës duhet të forcohet më tej me gjithë pengesat që Rusia ka vendosur për më shumë se një vit.

Fakti që Rusia dështoi të shkatërrojë OSBE-në, "është një kontribut i rëndësishëm për rendin tonë të paqes", është shprehur shefja e diplomacisë gjermane, duke theksuar se "ky rend paqeje duhet të vazhdojë".

Në fjalën e hapjes së punimeve, kryeministri maqedonas, Dimitar Kovaçevski, si nikoqir i samitit, është përqendruar në sfidat, me të cilat është përballuar OSBE-ja pas agresionit të paprovokuar të Rusisë kundër Ukrainës.

“Ne kemi kryesuar vitin më të vështirë për OSBE-në, duke pasur parasysh se organizata është përballur me një sërë sfidash në dritën e agresionit të pajustifikuar të Rusisë kundër Ukrainës. Por, shpresoj që do të arrijmë t'i miratojmë vendimet për të zgjedhur kryesuesin e ri dhe katër pozicionet më të rëndësishme në OSBE, si dhe buxhetin për funksionimin e organizatës", ka thënë Kovaçevski, teksa ka vënë theksin te takimi gjatë së mërkurës me Sekretarin amerikan të Shtetit, Antony Blinken, dhe me ministrin e Punëve të Jashtme të Britanisë, David Cameron.

"Duhet të jemi të vetëdijshëm se çdo vend në mënyrën e vet dërgon mesazhe për agresionin e pajustifikuar të Rusisë kundër një shteti sovran, në Ukrainë. Disa vende e bëjnë këtë me mungesën e tyre, dhe disa me pikëpamje të shprehura qartë”, ka thënë Kovaçevski.

Ai ka shtuar se agresioni rus kundër Ukrainës ka vazhduar "me intensitet të lartë dhe me pasoja të rënda dhe shkatërruese duke konfirmuar padrejtësinë e saj".

"Çdo ditë që kalon dhe çdo jetë e humbur po dëshmon ashpërsinë e agresionit dhe aktin e shkeljes flagrante të sovranitetit dhe të kartës së Kombeve të Bashkuara, parimet dhe angazhimet e OSBE-së, por para së gjithash vlerat njerëzore. Populli i Ukrainës meriton paqe dhe lufta duhet të ndërpritet. Arritja e paqes mbetet imperativ. Kjo luftë po vazhdon të rrënojë themelet e OSBE-së”, ka deklaruar Kovaçevski.

Ministri i Punëve të Jashtëm i Rusisë, Sergei Lavrov, në fjalimin e mbajtur në samit, ka akuzuar shtetet perëndimore dhe Aleancën Veri-atlantike për, siç është shprehur, “shkatërrimin e OSBE-së”, e cila, sipas tij, ndodhet në “gjendje të keqe dhe perspektiva të paqarta”.

“Vendet e NATO-s dhe BE-së shkatërruan dimensionin ushtarako-politik të OSBE-së. Në vitin 1999, NATO kreu një agresion brutal të pamaskuar kundër Jugosllavisë - një anëtare e OSBE-së dhe OKB-së. Dhe, në vitin 2008, duke shkelur Rezolutën 12 44 të Këshillit të Sigurimit të OKB-së dhe parimin e paprekshmërisë së kufijve në Evropë nga akti final i Helsinkit, Serbisë iu hoq Kosova pa asnjë referendum”, ka deklaruar Lavrov.

“Ka qenë në traditën tonë që të kemi fjalime pozitive, por kjo nuk po ndodh sepse OSBE-ja është bërë vegël e Bashkimit Evropian”, ka thënë Lavrov.

Sipas shefit të diplomacisë ruse, “OSBE-ja ka heshtur, kur qytetarëve u është mohuar e drejta e përdorimit të rusishtes” edhe pse, sipas tij, “aktet ndërkombëtare garantonin përdorimin e gjuhëve për të gjitha minoritetet”.

Ministri iJashtëm rus, Sergoi Lavrov, gjatë fjalimit në samitin e OSBE-së në Shkup, 30 nëntor 2023.

Lavrov ka thënë se në Ukrainë është mohuar ekzistenca e komunitetit rus.

Ministri i Jashtëm rus i quajti “përpjekje të turpshme angazhimet për të pranuar Ukrainën - e kryesuar nga një regjim neo-nazist - në BE, pa radhë”.

Ai ka folur edhe për sanksionet që Perëndimi vendosi ndaj Rusisë për shkak të agresionit në Ukrainë.

“Në një përpjekje për të shkatërruar ekonominë ruse, SHBA-ja dhe satelitët e saj evropianë kanë vendosur mijëra sanksione ndaj Rusisë, duke i dhënë fund bashkëpunimit të gjerë praktik midis Lindjes dhe Perëndimit në rajonin tonë dikur të përbashkët", është shprehur ai.

Sipas Lavrovit, Moldavia është viktima e radhës në luftën hibride të Perëndimit kundër Rusisë.

Disa nga ministrat e vendeve pjesëmarrës në samitin e OSBE-së në Shkup bojkotuan fjalimin e ministrit rus të Punëve të Jashtme, Sergei Lavrov.

Ata u ngritën dhe u larguan nga salla menjëherë pasi kryesuesi i OSBE-së, Bujar Osmani, paralajmëroi fjalimin e shefit të diplomacisë ruse./REL

Në Shkup të Maqedonisë së Veriut, po zhvillon punimet samiti i OSBE-së, me pjesëmarrjen e gjitha vendeve anëtare të Organizatës për Siguri dhe Bashkëpunim në Evropë, përfshirë Rusinë.

Sa e mori fjalën ministri i Punëve të Jashtme ruse, Sergei Lavrov, adresoi kritika të ashpëra ndaj OSBE-së, që sipas tij është bërë vegël e Bashkimit Evropian.

Më pastaj, Lavrov foli edhe për Kosovën, duke thënë se me shpalljen e pavarësisë më 2008-ën dhe pranimin e saj, është bërë siç thotë ai rrëmbimi i Kosovës nga Serbia , kjo duke shkelur Rezolutën 1244 të OKB-ës dhe pa referendum.

Gjatë fjalimit të Lavrovit, disa delegacione kanë lëshuar sallën e Samitit, ndërkohë reagim të rreptë bëri ministri i Punëve të Jashtme të Shqipërisë, Igli Hasani.

Ai tha se ngjarjet në Kosovë ishin shkëndija e fundit e tentimit për të shmangur vëmendjen nga lufta në Ukrainë, duke nxitur konflikt në Ballkanin Perëndimor. Ne po bëjmë më të mirën duke  luftuar këtë së bashku me aleatët dhe partnerët tanë. Sipas tij Shqipëria, vazhdon të punoj fort dhe në mënyrë proaktive  për një Ballkan Perëndimor stabil e paqësor.

Hasani, shtoi se një OSBE e fuqishme, është e nevojshme në ditët e sotme, pasi edhe përkundër progresit të dekadës së fundit, kërcënimet e vjetra janë duke dalë në sipërfaqe përsëri dhe pas këtyre tentativave për të shkaktuar probleme në Ballkanin Perëndimor, mund ta shihet qartë dora  e njëjtë që po dëshiron ta dobësojë OSBE-në.

Maqedonia e Veriut, këtë dhjetor përfundon kryesimin e OSBE-së, e nga 1 Janari 2024, për një vit këtë rol do ta kryejë Malta.

Ministri i Punëve të Jashtme, Bujar Osmani, hapi Këshillin Ministror të OSBE-së dhe në fjalën e tij hapëse u bëri thirrje të pranishmëve që të arrijnë konsensus për kryesimin e Maltës.

Ai përshëndeti delegacionet e pranishme në qytetin ku kryqëzohen kultura të ndryshme dhe kujtoi tërmetin e vitit 1963 kur bota e ndihmoi Shkupin.

“Kam tre mesazhe kyçe si kryetar. Maqedonia e Veriut mori përsipër OSBE-në në një kohë lufte aktive dhe një kërcënim për sigurinë evropiane dhe paqen ndërkombëtare. Agresioni rus kundër Ukrainës shkeli rregullat e kësaj organizate dhe prishi sigurinë evropiane dhe njerëzore, dialogun dhe shkatërroi jetën e njerëzve që duan të jetojnë të lirë dhe pa frikë nga lufta”.

“Në vend të interesit kolektiv, arrihen interesa kombëtare egoiste. Kjo krijoi një mjedis të vështirë operativ dhe kundër kësaj ne mbetëm të vendosur për të shërbyer si mbrojtës të vlerave të OSBE-së dhe shumica e shteteve anëtare shmangën disfatizmin dhe paraqitën sfida për ekzistencën e OSBE-së. Ne ishim në gjendje të arrinim rëndësinë për organizatën”.

“OSBE-ja mbeti e vendosur kundër të gjitha sfidave dhe vazhdon të punojë dhe organizojë të gjitha aktivitetet dhe të vazhdojë misionin kundër të gjitha sfidave. Disa misione vazhdojnë të ndihmojnë në rajone dhe ne jemi angazhuar në mënyrë aktive në të gjitha rajonet, përballë konflikteve të rënda në Ukrainë dhe Lindjen e Mesme. Ne duhet të forcojmë OSBE-në për të ardhmen”, tha Osmani.

Ai shtoi se do të vazhdojnë të ofrojnë zgjidhje për këto sfida kritike, duke u shprehur i kënaqur që OSBE ka gjetur kryesues për vitin 2024.

Kryeministri i Maqedonisë së Veriut Dimitar Kovaçevski, ka mbajtur fjalim në hapjen e Këshillit të 30-të ministror të OSBE-së që mbahet në Shkup.

Kovaçevski fjalimin e tij e nisi duke përmendur agresionin rus në Ukrainë, duke bërë thirrje për ndërprerje të luftës. Ai tha se me agresionin rus janë shkelur të gjitha konventat ndërkombëtare dhe vlerat humane.

“Agresioni i Rusisë kundër Ukrainës është shkelje e çdo konvente ndërkobëtare. Çdo ditë e kaluar tregon se agresioni ushtarak nuk është zgjidhje. Lufta në Ukrainë duhet të ndalojë sa më parë”, tha mes tjerash Kovaçevski

Ai gjithashtu përmendi edhe tensionet në vendet e rajonit, nduke bërë thirrje që të lihen anash agjendat nacionaliste.

Kovaçevski theksoi se ngjarja e sotme në Shkup është kulminacioni i udhëheqjes së RMV-së me OSBE-në.

Ndryshe, Maqedonia e Veriut është nikoqire e Këshillit të 30-të Ministror të Organizatës për Siguri dhe Bashkëpunim në Evropë – OSBE, ku marrin pjesë rreth 1000 delegatë nga 57 vende anëtare të Organizatës dhe vende partnere.

Në kuadër të Këshillit të Ministrave do të zhvillohen edhe disa ngjarje tematike të ndërlidhura, duke përfshirë nënshkrimin e Deklaratës për luftën kundër korrupsionit në Evropën Juglindore përmes kthimit të pronës dhe përdorimit të digjitalizimit, për të cilën përveç ministrit Osmani, nënshkrimet do të jenë edhe ministrat për punët e jashtme të Serbisë, Bosnjë e Hercegovinës, Malit të Zi dhe Shqipërisë, Ivica Daçiq, Elmedin Konakoviq, Filip Ivanoviq dhe Igli Hasani.

Maqedonia e Veriut është nikoqire e Këshillit të 30-të Ministror të Organizatës për Siguri dhe Bashkëpunim në Evropë – OSBE, ku marrin pjesë rreth 1000 delegatë nga 57 vende anëtare të Organizatës dhe vende partnere.

Kryesuesi i OSBE-së, Bujar Osmani, ka pritur ministrat e jashtëm, shefat të delegacioneve dhe delegatët e tjerë të nivelit të lartë në hapjen zyrtare të Këshillit të 30-të të Ministrave të OSBE-së që po mbahet në sot në Shkup.

Tashmë vetëm se kanë filluar të shkojnë të gjithë pjesëmarrësit në këtë takim.

“Presim diskutime dhe takime produktive. Së shpejti fillojmë me seancën plenare”, ka shkruar Osmani në platformën X.

Në këtë organizim do të marrë pjesë edhe ministri rus i Jashtëm, Sergei Lavrov.

Kjo ka shkaktuar debate e reagime të shumta, nëse Rusia me pjesëmarrjen në këtë samit, po përfiton dhe forcon pozitën e saj në skenën ndërkombëtare, përkundër pushtimit të paprovokuar të Ukrainës.

Ukraina dhe shtetet baltike në shenjë pakënaqësie nuk kanë dërguar ministrat e Punëve të Jashtme në Këshillin Ministror.

Punimet e Samitit kanë nisur jozyrtarisht të mërkurën në mbrëmje, me një darkë joformale dhe fotografi familjare, në epiqendër të së cilës ishte sekretari amerikan i Shtetit, Antony Blinken, por jo edhe ministri i Jashtëm i Rusisë, Sergei Lavrov pasi avioni me të cilin ai fluturonte ende nuk kishte arritur në Shkup.

Ministri i Punëve të Jashtme të Rusisë, Sergej Lavrov, nuk u ndal për deklaratë para gazetarëve gjatë hyrjes së tij në sallën “Boris Trajkovski”, ku po mbahet Këshilli i 30-të Ministror i OSBE-së.

Lavrovit megjithëse iu bënë disa pyetje nga gazetarët, ai u largua pa u përgjigjur.

Tani pritet të nis Samiti i OSBE-së.