Në kuadër të takimit ministror të ministrave të Transportit të Bashkimit Evropian, ku ishte i pranishëm edhe zëvendëskryeministri dhe ministri i Transportit Aleksandar Nikoloski, në fjalën e tij ai theksoi projektet e mëdha infrastrukturore që janë duke u realizuar në Maqedoni, të cilat janë me rëndësi kyçe për lidhjen me vendet nga Ballkani Perëndimor, për zhvillimin e rajonit dhe zhvillimin ekonomik dhe komunikimin më të mirë të qytetarëve në Maqedoni.
“Është vërtet një kënaqësi të jem me ministrat e transportit nga Bashkimi Evropian këto dy ditë. Po diskutojmë shumë tema të rëndësishme, ndoshta tema më e rëndësishme për qytetarët, që është lidhja se si të kalojmë më lehtë nga pika A në pikën B. Prezantova se çfarë po bën qeveria maqedonase në këta dy muaj e gjysmë. Së pari, sa i përket linjave ajrore, që kemi një politikë të re subvencionimi që pres që vitin e ardhshëm të sjellë destinacione të reja në aeroportin e Shkupit dhe të Ohrit, por edhe diku mbi 20% më shumë pasagjerë, më shumë turistë në Maqedoni dhe më shumë mundësi për qytetarët maqedonas që të udhëtojnë jashtë vendit.
Lidhur me hekurudhën, theksova se prioriteti numër një për Maqedoninë është ndërtimi i hekurudhës së shpejtë Shkup-Selanik me shpejtësi prej 200 km në orë, e cila duhet të ndryshojë tërësisht ekonominë e Maqedonisë dhe që duhet ta lidhë Maqedoninë me portet kryesore dhe në veri me Evropën Qendrore. Thashë se po punohet intensivisht edhe në ndërtimin e korridorit 8 hekurudhor, ku pjesa e parë e hekurudhës për në Bugaraijë është pothuajse gati, ndërsa pjesa e dytë është duke u punuar, dhe sa i përket seksionit të tretë kemi sfida teknike që unë. shpresoj se do t’i zgjidhim në periudhën e ardhshme si dhe sfidat në planin e projektimit dhe sigurisht të gjitha pengesat e tjera që përmenda në periudhën që ishte përpara nesh. Por shpresoj që edhe ne të gjejmë një gjuhë të përbashkët që të mos kemi një hekurudhë që përfundon në një tunel që nuk na çon askund.
Sa i përket ndërtimit të autostradave, thashë se deri në fund të vitit do të kemi përfunduar autostradën e shpejtë Kumanovë – Kriva Pallankë si dhe autostradën Prilep – Gradsko, që do të lehtësojë dukshëm komunikimin, se po punohet intensivisht në Ohër – Kërçovë dhe se në periudhën e ardhshme do të punohet shumë në Kërçovë – Bukojçan, në Bukojçan – Gostivar, në Gostivar – Tetovë si dhe në Prilep – Manastir.
Kjo është një mundësi e shkëlqyer për të shkëmbyer mendime, por edhe për të ftuar donatorët dhe investitorët potencial që të vijnë në Maqedoni për të dhuruar dhe investuar në mënyrë që sa më shpejt të ndërtojmë projektet që janë para nesh”, tha ministri Nikoloski.
