Organizata Botërore e Shëndetësisë ngre alarmin për rritjen e numrit të grave të prekura nga kanceri i gjirit.
Sipas statistikave, çdo vit tek ne diagnostikohen mbi 1 mijë gra, ndërsa rreth 350 humbin jetën, shkruan Alsat.
OBSH bënë thirrje tek institucionet shëndetësore, që të gjitha gratë pa marrë parasysh se në cilat vende jetojnë, rurale apo urbane të kenë të drejta të barabarta dhe qasje më të lehtë për skrining dhe trajtim në kohë të kancerit të gjirit.
“Kjo sëmundje çon në humbjen e jetëve veçanërisht në vendet që kanë resurse dhe kapacitete të kufizuara, ku 70 për qind e rasteve të vdekjeve ndodhin si pasojë e diagnostikimit të vonuar dhe mungesë të trajtimit në kohë. Sipas studimit kombëtarë për gjendjen me kancerin e gjirit për periudhën 2015-2022 në institutin e epidemiologjisë, çdo vit tek ne ka mbi 1 mijë gra të diagnostikuar me karcinom në gji, dhe mes 250-350 jetë të humbura në nivel vjetor nga kjo sëmundje”, tha Margarita Spasenovska, Përfaqësuese e OBSH-së.
Shoqata EZRA kritikoi institucionet shëndetësore për mungesën e terminëve për mamografi, ultrazë dhe rezonancë magnetike, pasi kjo sipas tyre çon në diagnostikimin e vonshëm të kacerit të gjirit dhe i ulë shanset për shërim të suksesshëm.
“Viteve të fundit institucionet shëndetësore premtojnë se do të përmirësojnë shërbimet shëndetësore, por edhe më tej pacientët kalojnë nëpër procese të rënda dhe të vështira përderisa presin qasje për terminë dhe shërime. Pacientët me kancer të gjirit, si dhe ato që bëjnë kontrolle të rregullta, presin me muaj për termin për ultrazë, mamografi dhe rezonancë magnetike që i bënë të kërkojnë shërbime në klinikat private dhe dëmtohen financiarisht”, u shpreh Liridona Limani, nga shoqata EZRA.
Në debatin për shënimit e muajit rozë, që i kushtohet rritjes së vetëdijesimit për kancerit të gjirit, kishte ankesa edhe për listën pozitive të barnave, pasi siç u tha nuk është shtuar asnjë ilaç për sëmundjet e kancerit.
Gjithashtu u vu në dukje edhe rritja e numrit tek vajzat e reja që preken me kancer të gjirit.
